ԵՐԵՎԱՆ, 16 դեկտեմբերի – Sputnik. Արայիկ Հարությունյանը պատերազմից հետո պատրաստ է եղել վայր դնել Արցախի նախագահի լիազորությունները, բայց մի քանի հիմնական պատճառ է ունեցել այդ քայլին չգնալու համար։ Նա այդ պատճառները հրապարակել է Facebook–ի իր էջում։
«Նախ՝ արդյո՞ք հետպատերազմյան հումանիտար աղետի առերեսված ու բազմաթիվ զրկանքների մեջ խրված Արցախը, արագ համախմբվելու և ժողովրդի առկա կարիքներով զբաղվելու փոխարեն, պետք է անցներ քաղաքական լարվածության ու կառավարման անկայունության մի երկարատև փուլ: Կարծում եմ՝ պատասխանը պարզ է. առնվազն անմեղսունակ պետք է լինել ժողովրդի դարդերը թողնելու և ներքաղաքական պայքարի կրկեսը մտնելու համար»,– գրել է նա։
Երկրորդ պատճառը նա ձևակերպել է հարցի տեսքով` արդյո՞ք արտաքին ու անվտանգային լրջագույն մարտահրավերների պայմաններում որևէ մեկը համոզված է, որ պատշաճ կամ նույնիսկ նվազագույն չափով երաշխավորված միջավայր ունենք արտահերթ նախագահական ու խորհրդարանական ընտրություններ կազմակերպելու և կայացնելու համար։
«Երրորդ՝ պետք չէ մոռանալ նաև սահմանադրական կարգավորումների մասին, որոնք այնպես են կառուցված, որ այս փուլում նախագահական ու խորհրդարանական արտահերթ ընտրությունները կարող են առաջացնել սահմանադրական ճգնաժամ՝ խորացնելով ընդհանուր պետական ճգնաժամը։ Չորրորդ և վերջապես՝ ես պատասխանատվությունից խուսափող մարդ չեմ, հակառակը՝ այս ծանր շրջանում ստանձնում եմ լրիվ պատասխանատվություն մեր Հայրենիքն ու ժողովրդին հետպատերազմյան ճգնաժամից հանելու հարցում: Իսկ ինչ վերաբերում է պատերազմի ընթացքում իմ և այլ պաշտոնատար անձանց գործողություններին ու վարքին, ապա ողջունում եմ հասարակական տարբեր կազմակերպությունների կողմից իրավապահ մարմիններ ներկայացված հաղորդումը հնարավոր պետական դավաճանության ու այլ ենթադրյալ հանցագործությունների վերաբերյալ»,– նշել է Արցախի նախագահը։
Հարությունյանը շեշտել է, որ պատրաստ է ամբողջությամբ աջակցել իրավապահ մարմիններին` այդ գործի մասով արդյունավետ քննություն անցկացնելու համար, պատրաստ է նաև անձամբ պարզաբանումներ ներկայացնել:
«Իսկ ինչ վերաբերում է հետաքննության արդյունքներին ու դրանցից բխող գործողություններին, ապա ոչ միայն պատրաստ եմ կրել իմ բաժին պատասխանատվությունը, այլ նաև պարտավոր եմ իմ լիազորությունների շրջանակներում հնարավորինս կատարել կոնկրետ հարցերում մեղավորներին պատասխանատվության ենթարկելու և վերհանված խնդիրները լուծելու ուղղությամբ»,– գրել է նա:
Հարությունյանը նշել է նաև, որ հրաժարվում է «Ազատ հայրենիք» կուսակցության նախագահի պաշտոնից և դուրս գալիս կուսակցությունից, որպեսզի հանրապետության նախագահի պաշտոնում կարողանա գործել և ընկալվել որպես պետության վերկուսակցական գլուխ, որպես մի գործիչ, որը պետք է ընդունվի որպես հատկապես ճգնաժամային իրավիճակներում համախմբող անձ։
Հիշեցնենք` Արցախի նախագահն այսօր պետք է հանդես գար տեսաուղերձով, սակայն տեխնիկական խնդիրներ էին առաջացել, և նա Facebook–ում հրապարակել էր իր ուղերձի տեքստը։
