ԵՐԵՎԱՆ, 11 դեկտեմբերի - Sputnik. Հայաստանի մարդու իրավունքների պաշտպան Արման Թաթոյանն ադրբեջանական դաժանությունների մասին նոր ապացույցներ է ուղարկել միջազգային մարմիններին: ՄԻՊ գրասենյակը Facebook-ի պաշտոնական էջում տեղեկացնում է, որ դրանք վերաբերում են պատերազմի ընթացքում և դրանից հետո Ադրբեջանի կատարած գործողություններին։ Ընդ որում` ապացույցները ներկայացվում են միասնական փաթեթով` սկսած սեպտեմբերի 27-ից:
«Կարևոր է, որ այս անգամ դրանք միասնական փաթեթով ուղարկվում են նաև այն երկրների քրեական հետապնդման մարմիններին, որոնք ունեն համընդհանուր իրավազորություն։ Ապացույցները մեր աշխատակազմում ենթարկվել են իրավական մշակման, ադրբեջաներենից կամ թուրքերենից թարգմանվել են անգլերեն ու ռուսերեն, իրականացվել է իրավական ամրագրում»,- նշված է պաշտպանի գրասենյակի տարածած հաղորդագրության մեջ։
Ապացույցներին կից ներկայացվում է նաև իրավական վերլուծություն։ Դրանով ցույց է տրվում, որ ադրբեջանական կողմն արհեստական է ձգձգում գերիների վերադարձն ու զինծառայողների մարմինների փոխանակումը:
Պաշտպանի պնդմամբ՝ կից վերլուծությամբ ցույց է տրվում նաև կապը դաժանությունների ու էթնիկ պատկանելիության հիմքով պետական աջակցությամբ հայատյացության, այն շարունակելու ադրբեջանական քաղաքականության հետ:
Նշվում է, որ բոլոր նյութերը կուղարկվեն նաև ՀՀ ԱԳՆ, միջազգային կառույցներում ՀՀ մշտական ներկայացուցիչներին, այլ երկրներում ՀՀ դիվանագիտական առաքելություններին, ինչպես նաև ՄԻԵԴ-ում ՀՀ ներկայացուցչին:
Հիշեցնենք`դեկտեմբերի 9-ին փոխվարչապետ Տիգրան Ավինյանի գրասենյակը հայտնեց, որ ռուսական կողմի միջնորդությամբ հայկական կողմին են փոխանցվել երեք հայ գերիներ: Ավելի ուշ հայտնի դարձավ, որ 3–ն էլ տարեց քաղաքացիական անձինք են։ Նրանք Հայաստանին են փոխանցվել առաջնահերթության սկզբունքով, առողջական լուրջ խնդիրներ ունենալու պատճառով։
Այնուհետև Արցախի մարդու իրավունքների պաշտպան Արտակ Բեգլարյանը Facebook–ում գրեց, որ Ադրբեջանը 3 գերիներից բացի հայկական կողմին է փոխանցել նաև 1 տարեցի մարմին։ Նա մահացել է ադրբեջանական գերության մեջ՝ մեզ համար դեռևս անհայտ հանգամանքներում։
