ԵՐԵՎԱՆ, 11 դեկտեմբերի - Sputnik. ՀՀ փոխվարչապետ Տիգրան Ավինյանն այսօր ընդունել է Հայաստանում Չինաստանի Ժողովրդական Հանրապետության նորանշանակ դեսպան Ֆան Յունին: Կառավարության մամուլի ծառայության տեղեկացմամբ՝ փոխվարչապետը նշել է, որ Չինաստանը Հայաստանի ամենակարևոր գործընկերներից է։ Նա ընդգծել է, որ փոխվստահության ու փոխադարձ շահերի վրա հիմնված հայ-չինական հարաբերությունների հետագա զարգացումը Հայաստանի համար շատ կարևոր է:
Դեսպանն էլ իր հերթին նշել է, որ ջանք չի խնայի հայ-չինական համագործակցության հետագա զարգացման ու ընդլայնման համար:
Փոխվարչապետ Ավինյանը խոսել է Արցախի շուրջ տեղի ունեցած վերջին զարգացումների մասին, ներկայացրել գերիների փոխանակման գործընթացը և հայկական կողմի դիրքորոշումը:
«Զրուցակիցները քննարկել են Հայաստանին տրամադրվող տեխնիկական աջակցության, մասնավորապես հանրային տրանսպորտի ու առողջապահության ոլորտի ծրագրերը, ինչպես նաև նախանշել տեխնիկական աջակցության շրջանակներում համագործակցության հետագա հնարավորությունները»,- նշված է հաղորդագրության մեջ։
Կողմերը գոհունակությամբ արձանագրել են, որ Չինաստանը Հայաստանի հիմնական առևտրային գործընկերներից է։ Նրանք վստահություն են հայտնել, որ համատեղ աշխատանքի միջոցով հնարավոր է առևտրաշրջանառության ծավալներն ավելի մեծացնել:
Ավինյանը կարևորել է չինական ուղղակի ներդրումների ներգրավումը և փոխշահավետ ծրագրերի իրականացումը:
Զրուցակիցներն անդրադարձել են Հայաստանում ժամանակակից տեխնոլոգիաների կիրառմամբ պղնձաձուլարանի կառուցման շուրջ քննարկումները վերսկսելու հնարավորությանը։
Հիշեցնենք, որ գործընթացը սկսվել էր դեռ անցած տարվա վերջին, սակայն ժամանակավորապես դադարեցվել էր՝ պայմանավորված կորոնավիրուսի համավարակով:
Քննարկվել է նաև հայ-չինական «Շանսի-Նաիրիտ» համատեղ ձեռնարկության աշխատանքը։ Անդրադարձ է արվել դրա գործունեության ընդլայնման հնարավորություններին:
