ԵՐԵՎԱՆ, 11 դեկտեմբերի — Sputnik. Տարածաշրջանում խաղաղության մասին խոսելը դեռ վաղ է ու երկար ժամանակ վաղ է լինելու։ Այսօր ԱԺ–ում ճեպազրույցի ժամանակ նման տեսակետ հայտնեց «Լուսավոր Հայաստան» խմբակցության ղեկավար Էդմոն Մարուքյանը` մեկնաբանելով Բաքվի շքերթում Ալիևի ու Էրդողանի ելույթները։
«Եթե Էրդողանը շարունակում է փառաբանել Ցեղասպանությունն ու Ցեղասպանություն իրականացնողի անունը հատուկ, առանձնակի դիտավորությամբ հնչեցնում այնտեղ, դա նշանակում է, որ իրենք չեն հրաժարվել ցեղասպանական քաղաքականությունից։ Հետևաբար, անվտանգության առումով Թուրքիան մեզ համար վստահություն չներշնչող կողմ է»,– ասաց Մարուքյանը` նույն գնահատականը տալով նաև Ալիևի խոսքերին։
«Լուսավոր Հայաստանի» ղեկավարի դիտարկմամբ` պատահական չէր, որ այդ հայտարարություններին առաջինը հենց Ռուսաստանն արձագանքեց, քանի որ, իր համոզմամբ, Թուրքիայի ու Ադրբեջանի հայտարարություններն առաջին հերթին հենց ՌԴ–ի դեմ էին` որպես եռակողմ հայտարարության միջնորդի ու կատարման երաշխավորի։
«Մինչև իրենք չձերբազատվեն իրենց այդ մոտեցումներից, ես չեմ պատկերացնում որևէ հարաբերություն, գործակցություն` հանուն տարածաշրջանի զարգացման` ճանապարհները բացվեն, իրար հետ առևտուր անենք և այլն։ Պետք է ռեալ երաշխիքներ լինեն, որ որևէ նպատակ չկա այլևս, ՀՀ–ի կամ Արցախի մնացած տարածքների նկատմամբ որևէ ոտնձգություն չիրականացնելու»,–ասաց Մարուքյանը։
Իրանի արտգործնախարարը կոշտ պատասխան է տվել Էրդողանի` Բաքվի շքերթի ելույթին
Հիշեցնենք` դեկտեմբերի 10-ին Բաքվում կայացած զորահանդեսում Թուրքիայի նախագահ Էրդողանը հայտարարել էր, թե հիմա «Էնվեր Փաշայի հոգին փառավորվել է»։
Ադրբեջանի նախագահ Ալիևն էլ ասել էր, որ Զանգեզուրը, Սևանն ու Երևանն իրենց պատմական հողերն են։ «Մեր ժողովուրդը այդ տարածքներում դարերով ապրել է։ Սակայն Հայաստանի ղեկավարությունը այդ մարդկանց գաղթեցրել է»,– ասել է նա։
Ալիևը նաև շեշտել էր, որ հարկավոր է պատրաստվել նոր պատերազմի։
