ԵՐԵՎԱՆ, 10 դեկտեմբերի — Sputnik. ԱԺ–ն այսօր փակ գաղտնի քվեարկությամբ մերժեց Կարեն Առուստամյանին ՀՀ հաշվեքննիչ պալատի անդամ նշանակելու առաջարկը։ Նշենք, որ նրա թեկնածությունն առաջադրել էր «Իմ քայլը» խմբակցությունը։
Ինչպես ներկայացրեց ԱԺ Հաշվիչ հանձնախմբի նախագահ Վահագն Հովակիմյանը, ձայները բաշխվել են 79 կողմ, 3 դեմ, ինչը բավարար չէ ընտրությունը հաստատելու համար։
Նշենք, որ հաշվեքննիչ պալատի անդամ ընտրվելու համար հարկավոր է պատգամավորների 3/5–ից ավելիի ձայները։ Տվյալ դեպքում պակասել է 0,2 միավոր։
ՀՀ ԱԺ նախագահ Արարատ Միրզոյանը հայտնեց, որ այսօր դարձյալ նամակով կդիմի ԱԺ բոլոր խմբակցություններին` հաշվեքննիչ պալատի անդամի թափուր տեղի համար թեկնածուներ առաջադրելու առաջարկով։
«Այնուհետև պիտի խնդրենք ԱԺ ֆինանսավարկային և բյուջետային մշտական հանձնաժողովին համապատասխան որոշում կայացնել, որից հետո կրկին կունենանք քվեարկություն»,– ասաց Միրզոյանը։
Փակ գաղտնի քվեարկության արդյունքում ԿԲ խորհրդի անդամի պաշտոնում խորհրդարանը հաստատել է Դավիթ Նահապետյանի թեկնածությունը։ Հովակիմյանի խոսքով` նրան կողմ է քվեարկել`81, դեմ` 1 պատգամավոր։
Նահապետյանի թեկնածությունն առաջադրվել էր «Իմ քայլը» խմբակցության կողմից։ Նահապետյանը ԿԲ-ում աշխատում է 2006թ.-ից: 2006-2015 թթ-ին եղել է ԿԲ աշխատակազմի ղեկավարի տեղակալը, 2015-2017 թթ՝ ԿԲ աշխատակազմի ղեկավարը, 2017-ից առ այսօր՝ ԿԲ-ի գլխավոր քարտուղար, գործադիր կոմիտեի անդամ:
ԱԺ Տարածքային կառավարման, տեղական ինքնակառավարման, գյուղատնտեսության ու բնապահպանության մշտական հանձնաժողովի նախագահի պաշտոնի համար գործընկերները քվեարկեցին «Իմ քայլը» խմբակցության պատգամավոր Վահե Ղալումյանի օգտին` 77 կողմ, 4 դեմ ձայնով։
Ավելի քան 800 մարդ է տեղավորվել Ասկերանի շրջանում․ ամենասուր հարցը ջեռուցումն է
Նշենք, որ մինչ այս հանձնաժողովի նախագահի պաշտոնը զբաղեցնում էր «Իմ քայլը» խմբակցության պատգամավոր Վարազդատ Կարապետյանը, որը նոյեմբերի 25-ին հայտարարել էր, որ վայր է դնում պատգամավորական մանդատը։
