ԵՐԵՎԱՆ, 9 դեկտեմբերի- Sputnik. ՀՀ ԱԺ-ն այսօր 84 կողմ, 14 դեմ ձայների հարաբերակցությամբ ընդունեց 2021 թվականի պետական բյուջեն։ Դրանով մասնավորապես առաջարկվում է պահպանել ու ավելացնել պաշտպանության ու սոցիալական ապահովության ծախսերը։ Միաժամանակ մի փոքր կկրճատվեն գիտության ու մշակույթի ոլորտների ծախսերը, հիմնականում կորոնավիրուսի պատճառով չեղարկված միջոցառումների հաշվին։
Իսկ հանրակրթական ոլորտի ծախսերը ոչ միայն չեն նվազի, այլև կաճեն 3,3 միլիարդ դրամով` 100 միլիարդից դառնալով 103 միլիարդ դրամ։ Բարձրագույն ու հետբուհական կրթության ծախսերը կնվազեն 6,1%-ով ու կհասնեն 11,9 միլիարդ դրամի՝ ուսանողների թվի կրճատման պատճառով։ Ընդհանուր առմամբ գիտության, կրթության, մշակույթի ու սպորտի նախարարության ծախսերը այդքան զգալի չեն կրճատվի՝ 2 միլիարդ դրամով կամ 1,1%-ով ու կկազմեն 175,6 միլիարդ դրամ։
Զգալիորեն կաճեն սոցիալական ապահովման ծախսերը՝ 10,7 միլիարդ դրամով, և կկազմեն 498 միլիարդ դրամ։
Պաշտպանության ծախսերը կավելանան մոտ 10,1 միլիարդ դրամով` հասնելով մոտ 218 միլիարդի։ 2021 թվականին պաշտպանական տեխնոլոգիաների ֆինանսավորումը կավելանա գրեթե 20%-ով (4,5 միլիարդ դրամով), սակայն բացարձակ թիվը դեռ համեմատաբար փոքր է։
Առողջապահական ծախսերը գրեթե կմնան 2020 թվականի մակարդակին (կաճեն 2%-ով)։
2021թ–ին նախատեսվում է 3,2% տնտեսական աճ. Ջանջուղազյանը ներկայացրել է բյուջեն
Ընդհանուր առմամբ նախատեսվում է, որ բյուջեն կունենա 1 տրիլիոն 569 միլիարդ դոլար եկամուտ, 9%-ով ավելի, քան նախատեսված էր 2020 թվականի նախագծում (արդյունքները դեռ չեն ամփոփվել)։ Ծախսերը քիչ են ավելանալու՝ բյուջեի պակասուրդի աճը զսպելու համար։ Դրանք կկազմեն 1 տրիլիոն 843 միլիարդ դրամ․2020 թվականի համեմատ կաճեն ընդամենը 1,2%-ով։
Այսպիսով՝ բյուջեի պակասուրդը կկրճատվի ու 383-ից հասնելով 274 միլիարդ դրամի։ Եթե մինչճգնաժամային 2018-19 թվականներին պակասուրդի հարաբերակցությունը ՀՆԱ-ում համեմատաբար փոքր էր (1,8 % ու 1,0% համապատասխանաբար), ապա 2020 թվականի վերանայված բյուջեում պակասուրդը հասել է 6,1%-ի։ Սակայն 2021 թվականն այն կնվազի ու կհասնի 4,1%-ի։
