ԵՐԵՎԱՆ, 9 դեկտեմբերի - Sputnik. Այսօր Աժ–ում, անդրադառնալով Արցախյան հարցի լուծման գործընթացին, ՀՀ վարչապետ Նիկոլ Փաշինյանը կրկնեց նախկինում հնչեցրած իր միտքը, որ առաջարկվող լուծումը պետք է ընդունելի լինի Հայաստանի, Արցախի ու Ադրբեջանի ժողովրդի համար։
Խոսելով զիջումների մասին Փաշինյանը հայտարարեց. «Այդ գինը բանակցային ողջ գործընթացի ընթացքում ծանրացել է, մեծացել է և հասել է մի շատ մեծ, բարդ և անընդունելի չափերի»։
Անդրադառնալով մեղադրանքներին, թե վերջին 2.5 տարվա ընթացքում բանակի համար անհրաժեշտ սպառազինություններ ձեռք չեն բերվել, վարչապետը հակընդդեմ հարցով պատասխանեց. «Իսկ ինչո՞ւ այն, ինչ մենք վերջին 2.5 տարվա ընթացքում ձեռք չենք բերել, դուք նախորդ 20 տարվա ընթացքում ձեռք չեք բերել»։
Փաշինյանն ընդգծեց, որ վերջին 2.5 տարում իրենք լուծել են զինծառայողի աշխատավարձերի բարձրացման, զինվորի կոշիկի, ներքնաշորի, արկերի, սննդի հարցը։
Խամաճիկային իշխանություն են առաջարկում. Փաշինյանը խոսեց իր հրաժարականը պահանջողների մասին
«Այո, մենք ձախողել ենք, որ վերջին 2.5 տարում չենք հասցրել անել այն, ինչ չի արվել նախորդ 20 տարվա ընթացքում։ Մենք պատրաստ ենք ու կկանգնենք ժողովրդի դատի առաջ։ Ժողովուրդն իրավունք ունի դատել և կդատի, իսկ դատավճիռը մենք խոնարհ կընդունենք»,– ասաց Փաշինյանը։
Հիշեցնեք, որ այսօր Ազգային ժողովում կառավարություն-ԱԺ հարցուպատասխանի ժամ է։
Դրան զուգահեռ Բաղրամյան պողոտայում հանրահավեք էր անցկացնում Հայրենիքի փրկության շարժումը։ Ընդդիմադիր կուսակցությունների նախաձառնությամբ ստեղծված շարժումը պահանջում է վարչապետ Փաշինյանի հրաժարականը։
