ԵՐԵՎԱՆ, 9 դեկտեմբերի - Sputnik. Ընդդիմության կողմից վարչապետի միասնական թեկնածու առաջադրված Վազգեն Մանուկյանն այսօր Ազգային ժողովի շենքի մոտ Հայրենիքի փրկության շարժման կազմակերպած բողոքի ակցիայի ժամանակ հայտարարեց, որ այն, ինչ կատարվեց Արցախի հետ, նույնը փորձում են անել Հայաստանի հետ։
«Օտարի միջոցով կոտորվել է մեր ամբողջ պետությունը։ Մենք այս տարածաշրջանի միակ հաղթող պետությունն էինք, համարվում էինք հզոր բանակ ունեցող... 2.5 տարում այդ ամենը ոչնչացավ։ Մեր պայքարը քաղաքական պայքար չէ, իշխանափոխության պայքար չէ, սա ազգային պայքար է»,–ասաց Մանուկյանը։
Նա վերհիշեց, որ իր կանգնած տեղում ժամանակին ելույթ են ունեցել առաջնորդներ, որոնք ժողովրդին տարել են դեպի հաղթանակ, և դրա արդյունքում ունեցել ենք անկախ պետություն։
«Այժմ ասում եմ ձեզ` գնանք միասին ու կհաղթենք։ Այս գործընթացն ինչքան երկար տևի, այնքան կործանիչ է լինելու մեր ազգի համար։ Այսօր մենք ծնկի իջած ողորմություն ենք խնդրում այս ու այն երկրից։ Նորից ոտքի կկանգնենք ու առաջ կգնանք։ Բոլորս միասին դեպի հաղթանակ»,–ասաց Մանուկյանը։
Նա նշեց, որ առաջիկայում ինքը տեսնում է, թե հայ ժողովուրդն ինչպես է կրկին հզոր և արդար պետություն ունենալու։
Հիշեցնենք` ՀՀ վարչապետ Նիկոլ Փաշինյանի հրաժարականի պահանջով բողոքի ակցիաները սկսվեցին Արցախի վերաբերյալ եռակողմ հայտարարությունից հետո։
Հայրենիքի փրկության շարժման կազմակերպած բողոքի ակցիաների մասնակիցներն այսօր Երևանի տարբեր հատվածներից երթ են կազմակերպել ու հավաքվել Ազգային ժողովի մոտ։ Նրանք վաղը` ժամը 11–ին, կհավաքվեն կառավարության շենքի մոտ և կրկին կպահանջեն ՀՀ վարչապետի հրաժարականը։
