ԵՐԵՎԱՆ, 9 դեկտեմբերի - Sputnik. Ոչ ոք այսօր չի կարող ամբողջապես գնահատել կորցրածը։ Sputnik Արմենիայի հետ զրույցում ասաց տնտեսագետ Վահագն Խաչատրյանը` խոսելով Արցախյան վերջին պատերազմի հետևանքով ու հրադադարի եռակողմ հայտարարության արդյունքում Հայաստանի ու Արցախի կրած տնտեսական կորուստների մասին։
«Մենք ենթակառուցվածքներ ենք կորցրել, որի պատկերն ամբողջական չունենք։ Եվ որպեսզի կարողանանք բոլոր հարցերի պատասխանը տալ, այդ թվում` նաև ֆինանսական միջոցների, անշարժ ու շարժական գույքի, ունեցվածքի կորուստների, նախ պետք է հաշվառենք, թե ինչ ենք կորցրել»,– ասաց Խաչատրյանը։
Նրա խոսքով, ՀՀ և Արցախի իշխանությունները պետք է կարողանան գնահատել իրավիճակն ու լուծումներ գտնեն։
Մինչ այդ Վահագն Խաչատրյանն արձանագրում է, որ Արցախի տնտեսությունը տարեկան 400 մլն դոլարի ՀՆԱ էր տալիս, այն դեպքում, երբ Հայաստանի ՀՆԱ–ն 2019թ–ին 13 մլրդ 740 մլն դոլար է եղել։
«Տոկոսային հարաբերությամբ կարող ենք ասել, որ մի քանի տոկոս է, բայց իր մուլտիպլիկատիվ էֆեկտով լուրջ տնտեսություն էր, աշխատատեղեր էին, և դրա ազդեցությունը Հայաստան վրա էական էր։ Հիմա մենք այդ տնտեսությունը չունենք»,– ասաց տնտեսագետը` շեշտելով, որ 2021թ–ի տնտեսական ծրագրերը մշակելիս այս կորուստն ուղղակի չի կարելի հաշվի չառնել։
Տեղին է այդ հարցը բարձրացնելը. Խաչատրյանը նոր նախարարի հայտարարությունը վաղաժամ է համարում
Արցախի տնտեսության կորուստը Խաչատրյանի խոսքով, պետք է փորձ արվի վերականգնել Հայաստանում։ Հայաստանում պոտենցիալ, նրա համոզմամբ, կա, այն ուղղակի պետք է ճիշտ օգտագործել։
