ԵՐԵՎԱՆ, 8 դեկտեմբերի - Sputnik. Հայաստանի արտաքին գործերի նախարար Արա Այվազյանը Ֆրանսիայի արտաքին գործերի նախարար Ժան-Իվ լը Դրիանի հետ համատեղ մամուլի ասուլիսի ժամանակ շնորհակալություն է հայտնել Ֆրանսիային։ Այս մասին տեղեկացնում է ՀՀ ԱԳՆ տելեգրամ–ալիքը։
«Վերջին ամիսներին մենք իսկապես զգացել ենք ֆրանսիացի ժողովրդի և պետության անկեղծ աջակցությունն ու համակրանքը: Դրա ամենավառ ապացույցը ինչպես մարդասիրական օգնությունն է, այնպես էլ ֆրանսիական մտավորականության, արվեստի և մշակույթի գործիչների, պետական գործիչների և քաղաքական գործիչների հազարավոր հայտարարություններ ու հրապարակումներ», – ասել է նախարարը։
Այվազյանը նշել է, որ արդյունավետ զրույց է ունեցել ֆրանսիացի գործընկերոջ հետ։ Քննարկման առանցքում եղել է Արցախը։
«Մենք մանրամասնորեն քննարկեցինք Լեռնային Ղարաբաղի հակամարտության երկարաժամկետ կարգավորման խնդիրը։ Ես հայտնեցի, որ Հայաստանը մտահոգ է պատերազմի ընթացքում Արցախը լքած հայ բնակչության` իրենց բնակության վայրեր անվտանգ և արժանապատիվ վերադառնալու հարցով», – ասել է նախարարը։
Այվազյանը մամուլի ասուլիսի ժամանակ խոսել է նաև գերիների և մշակութային կոթողների մասին։
Հիշեցնենք, որ եռակողմ հայտարարության կետերից մեկի համաձայն՝ ներքին տեղահանվածները և փախստականները պետք է վերադառնան ԼՂ և հարակից շրջաններ, իրականացվելու է ռազմագերիների փոխանակություն և մյուս պահվող անձանց փոխանակություն, ապաարգելափակվելու են բոլոր տնտեսական և տրանսպորտային կապերը տարածաշրջանում։
Նշենք, որ Հայաստանի նորանշանակ արտգործնախարարն իր առաջին արտասահմանյան այցն իրականացրեց Մոսկվա՝ դեկտեմբերի 6–ին և 7-ին, որտեղ բանակցություններ վարեց ՌԴ ԱԳ նախարար Սերգեյ Լավրովի հետ:
Դեկտեմբերի 8-ին Արա Այվազյանը երկօրյա աշխատանքային այցով մեկնել է Ֆրանսիա։
