«Հորդորեք Ադրբեջանին, որ հանձնի գերիներին». ԱԺ–ն կոչ է արել ՄԱԿ–ին և Մինսկի խմբին

ԵՐԵՎԱՆ, 8 դեկտեմբերի - Sputnik. Հայաստանի Ազգային ժողովը ուղերձով դիմել է ՄԱԿ-ի Մարդու իրավունքների խորհրդին, ՄԱԿ-ի խոշտանգումների դեմ կոմիտեին և Խոշտանգումների կանխման ենթակոմիտեին, ՄԱԿ-ի Մարդու իրավունքների գերագույն հանձնակատարին, Ռասայական խտրականության վերացման կոմիտեին, Եվրոպայի խորհրդի Մարդու իրավունքների հանձնակատարին, Խոշտանգումների կանխման եվրոպական կոմիտեին, Կարմիր խաչի միջազգային կոմիտեին եւ մարդու իրավունքների պաշտպանությամբ զբաղվող այլ միջազգային ու ազգային կազմակերպություններին, կառույցներին եւ անձանց, միջխորհրդարանական կազմակերպություններին, ԵԱՀԿ Մինսկի խմբի համանախագահ երկրներին։

Ուղերձը տեղադրված է ԱԺ կայքում։

Ուղերձով ԱԺ–ն կոչ է անում միջազգային վերոնշյալ կառույցներին հորդորել Ադրբեջանին՝ անհապաղ հայկական կողմին հանձնել իր վերահսկողության ներքո գտնվող ռազմագերիներին, ներկալված և անազատության մեջ գտնվող քաղաքացիական այլ անձանց։

Հաջորդ կետով խորհրդարանը կոչ է անում ՄԱԿ–ին՝ պահանջել Ադրբեջանից դադարեցնել խոշտանգումները, անմարդկային և դաժան վերաբերմունքը ռազմագերիների նկատմամբ, ինչպես նաև պարտավորեցնել Ադրբեջանին՝ դադարեցնել վերոնշյալ կոպտագույն խախտումների դրդապատճառ հանդիսացող հայատյացության քաղաքականությունը հանրային կյանքի բոլոր ոլորտներում՝ ուսումնական հաստատություններում, հասարակական, ռազմական եւ քաղաքական գործիչների հանրային խոսքում, զանգվածային լրատվության միջոցներում, սոցիալական ցանցերում, ինչպես նաեւ ցանկացած այլ դրսեւորման մեջ։

Երևանը հուսով է, որ Բաքուն չի փորձի խափանել գերիների փոխանակման գործընթացը. Այվազյան

Վերջին կետով կոչ է արվում գործուն միջոցներ ձեռնարկել՝ միտված Ադրբեջանի կողմից մարդու իրավունքների միջազգային իրավունքով եւ միջազգային մարդասիրական իրավունքով ստանձնած պարտավորությունների հարգմանն ու խստիվ պահպանմանը։

Նշենք, որ դեկտեմբերի 4-ին հայկական և ադրբեջանական կողմերը գերիների ցուցակները փոխանցել են ԿԽՄԿ-ին։ Արցախի մարդու իրավունքների պաշտպան Արտակ Բեգլարյանի տվյալներով` Ադրբեջանում պահվում է մոտ 60 հայ գերի։