ԵՐԵՎԱՆ, 7 դեկտեմբերի - Sputnik. «Լուսավոր Հայաստան» կուսակցությունն առաջիկայում կհանդիպի 16 քաղաքական ուժերի առաջադրած անցումային կառավարության ղեկավարի թեկնածու, նախկին վարչապետ, նախկին ՊՆ, Հանրային խորհրդի նախկին նախագահ Վազգեն Մանուկյանի հետ։
Այս մասին այսօր ԱԺ–ում կազմակերպված լսումների ժամանակ, պատասխանելով «Լուսավոր Հայաստանի» կողմից Վազգեն Մանուկյանի թեկնածությունը չընդունելու հարցին, ասաց Մարուքյանը։
«Պետք է հանդիպենք, խոսենք, շփվենք, Ես կարծում եմ, որ որևէ առումով մենք չպիտի ասենք, որ ամենաճիշտն իմն է, ու ես պետք է այսպես անեմ, կամ մյուսն ասի` չէ, իմն է ամենաճիշտը, ես պետք է այսպես անեմ ։ Այլապես չի ստացվի միասնական որևէ գործողություն, միասնական որևէ շարժում, այդ թվում` «Իմ քայլը» դաշինքի հետ»,– ասաց ԼՀԿ ղեկավարը։
Մենք երբեք չենք հաշտվի այդ փաստաթղթի հետ. Վազգեն Մանուկյան
Նա նաև հայտնեց, որ մինչ Մանուկյանի թեկնածության հրապարակային ներկայացումը «Լուսավոր Հայաստանն» արդեն իսկ շփումներ, խորհրդակցություններ ունեցել է 16 ուժերի համակարգող մարմնի հետ։
«Մեզ ներկայացվել է 16 ուժերի միասնական թեկնածուի մասին որոշումը։ Շատ հարգանքով ենք մոտենում ցանկացած քաղքական ուժի ` վարչապետի սեփական թեկնածու ունենալու իրավունքին, և մենք էլ իրազեկել ենք, որ որպես քաղաքական ուժ վարչապետի թեկնածուով ենք խորհրդարանական ընտրություններին մասնակցել, որից հետո հարգանքով իրարից բաժանվել ենք»,– ասաց Մարությանը։
«Լուսավոր Հայաստանի» ղեկավարը չցանկացավ գնահատականներ հնչեցնել Վազգեն Մանուկյանի անցած քաղաքական ուղու, տարբեր պաշտոններում նրա կատարած աշխատանքի մասին։
Հիշեցնենք` ավելի վաղ «Լուսավոր Հայաստան» կուսակցության անդամ Գևորգ Գորգիսյանը տեղեկացրել էր, որ դեկտեմբերի 2-ի ուշ երեկոյան «Լուսավոր Հայաստան» կուսակցության նախագահ Էդմոն Մարուքյանի հետ հանդիպել են «Հայ Յեղափոխական Դաշնակցություն» կուսակցության ներկայացուցիչ Իշխան Սաղաթելյանին։
Գորգիսյանի խոսքով` Սաղաթելյանը լիազորված է եղել 16 կուսակցությունների անունից իրազեկելու, որ որոշում են կայացրել` իրենց վարչապետի միասնական թեկնածուն Վազգեն Մանուկյանն է։ Սաղաթելյանը հարցրել է ԼՀԿ ներկայացուցիչներին` ինչ դիրքորոշում ունեն նրանք այդ կապակցությամբ։
Գորգիսյանն ասել էր, որ իրենց մոտեցումների համընկնում ունեն այն հարցում, որ գործող վարչապետը պետք է հրաժարական տա։ Բայց «Լուսավոր Հայաստան» կուսակցության կառավարման խորհրդի որոշման համաձայն՝ կուսակցությունն ընտրություններին մասնակցել է իր վարչապետի իր` Էդմոն Մարուքյանի թեկնածուով, և այդ որոշումը չի փոխվել։
Հավելենք, որ դեկտեմբերի 5-ին կայացած հանրահավաքից ու երթից հետո ընդդիմադիր ուժերի ստեղծած Հայրենիքի փրկության շարժումը հայտարարել է, որ Նիկոլ Փաշինյանը պետք է մինչև դեկտեմբերի 8-ի ժամը 12-ը հրաժարական տա, այլապես բողոքի ակցաները կընդգրկեն ողջ հանրապետությունը։
