ԵՐԵՎԱՆ, 7 դեկտեմբերի - Sputnik. Ռուսաստանը հետաքրքրված է, որ հայ և ադրբեջանցի ժողովուրդների միջև բարիդրացիական հարաբերություններ հաստատվեն ինչպես Լեռնային Ղարաբաղի տարածքում, այնպես էլ միջպետական մակարդակով։ Նման կարծիք հայտնեց ՌԴ ԱԳ նախարար Սերգեյ Լավրովն այսօր հայաստանցի գործընկերոջ հետ համատեղ մամուլի ասուլիսի ընթացքում։
«Սա կնպաստեր տարածաշրջանում վստահության, գործընկերային մթնոլորտի ձևավորմանը՝ ի նպաստ այստեղ ապրող բոլոր ժողովուրդների, այս տարածաշրջանում տեղակայված բոլոր պետությունների։ Մենք վստահ ենք, որ տարբեր ազգերի, տարբեր հավատքի ներկայացուցիչները պետք է ապրեն խաղաղության և անվտանգության մթնոլորտում՝ որտեղ էլ որ լինեն։ Հարավային Կովկասն արժանի է նման վերաբերմունքի»,- ասել է Լավրովն ու հայտարարել, որ իրենք ամեն կերպ կաջակցեն գործընթացին։
Հայ-ռուսական բանակցությունների ժամանակ անդրադարձ է արվել նաև Մինսկի խմբի համանախագահների դերակատարմանը խաղաղության ամրապնդման հարցում։
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության մեջ մասնավորապես նշվում է, որ մինչև նոյեմբերի 15-ը Ադրբեջանին է վերադարձնում Քելբաջարը (ավելի ուշ այդ ժամկետը 10 օրով երկարաձգվեց-խմբ.), մինչև նոյեմբերի 20-ը՝ Աղդամի շրջանը, մինչև դեկտեմբերի 1-ը՝ Լաչինի շրջանը` թողնելով միջանցք 5 կմ լայնությամբ, որը ապահովելու է Հայաստանի կապը, սակայն չի շոշափելու Շուշին։
Հայաստանն ապահովում է տրանսպորտային կապ Ադրբեջանի արևմտյան շրջանների և Նախիջևանի Ինքնավար Հանրապետության միջև։
Շփման գծի երկայնքով Լեռնային Ղարաբաղում և Լաչինի միջանցքում հաստատվում են ռուսական խաղաղապահ ուժեր 1960 զինվորականի չափով, հրազենային զենքով, 90 զրահատրանսպորտային և 380 ավտոմեքենաներով և հատուկ տեխնիկայով։
Խաղաղապահները մնում են հինգ տարի ժամանակով` ավտոմատ երկարացման հնարավորությամբ, եթե հաջորդ հինգ տարվա համար կողմերը ժամկետի լրանալուց վեց ամիս առաջ չեն հայտարարում այս դրույթի կիրառությունը դադարեցնելու մասին։
