ԵՐԵՎԱՆ, 7 դեկտեմբերի - Sputnik. ՀՀ գլխավոր դատախազ Արթուր Դավթյանն այսօր գրություններ է հասցեագրել ՀՀ ազգային անվտանգության ծառայության տնօրեն Արմեն Աբազյանին և ՀՀ ոստիկանության պետ Վահե Ղազարյանին։ Դատախազության մամուլի ծառայության հաղորդմամբ՝ դրանց նպատակն է անհապաղ ձեռնարկել անհրաժեշտ օպերատիվ-հետախուզական միջոցառումներ Արցախից Հայաստան ապօրինի զենքի տեղափոխման դեպքերը, նաև դրանց գործադրմամբ հնարավոր նախապատրաստվող հանցագործությունները կանխելու և բացահայտելու, այդ ուղղությամբ աշխատանքներն ակտիվացնելու համար։
Նշվում է, որ Արցախի դեմ սանձազերծված պատերազմի ընթացքում ռազմական գործողություններին մասնակցության նպատակով մեծ թվով անձանց տարբեր զինատեսակների և ռազմամթերքի տրամադրումը լուրջ վտանգներ է ստեղծել ռազմական գործողությունների ավարտից հետո դրանց ապօրինի շրջանառության համար: Դատախազության դիտարկմամբ՝ դրա վկայությունն են Արցախից դեպի Հայաստան ապօրինաբար զենք և ռազմամթերք տեղափոխելու բազմաթիվ դեպքերը, դրանցով հարուցված մի քանի տասնյակ քրեական գործերը։
«Ռազմական գործողությունների ավարտից հետո Հայաստանի Հանրապետությունում տեղի ունեցող իրադարձությունները, դրանց հետ կապված հանցագործությունները, հրապարակային ելույթներում, այդ թվում նաև 2020թ դեկտեմբերի 5-ին Երևան քաղաքի Ազատության հրապարակում կազմակերպված հավաքում հնչեցված՝ որոշակի գործողություների անխուսափելիության կամ թույլատրելիության մասին դիրքորոշումներով համեմված հայտարարությունները, ստեղծում են զենքի ապօրինի գործադրմամբ հանցավոր դրսևորումների ռիսկեր և դրանով պայմանավորված՝ քաղաքացիների, այդ թվում նաև զանգվածային հավաքներին մասնակցող, կյանքի և առողջության պաշտպանությանը, հասարակական կարգին սպառնացող վտանգներ»,- նշված է հաղորդագրութնան մեջ։
Միաժամանակ դատախազությունը կոչ է անում քաղաքացիներին զերծ մնալ հանցավոր հնարավոր դրևորումներից, բռնություններով կամ բռնության գործադրման կոչերով զուգորդվող գործողությունների դիմելուց կամ դրանցում ներգրավվելուց: Հակառակ դեպքում հանցավոր արարքներ կատարող բոլոր անձինք օրենքի ողջ խստությամբ կենթարկվեն քրեական պատասխանատվության:
