ԵՐԵՎԱՆ, 7 դեկտեմբերի - Sputnik. Վաղը` դեկտեմբերի 8-ին մեկնարկող ԱԺ այս տարվա վերջին քառօրյա նիստում խորհրդարանը կքննարկի ռազմագերիների հետ կապված խնդիրը։
Այս մասին այսօր ԱԺ–ում կազմակերպված լսումների ժամանակ հայտարարեց «Լուսավոր Հայաստան» խմբակցության ղեկավար Էդմոն Մարուքյանը` հավելելով, որ նիստի օրակարգում այդ հարցը ներառվել է «Լուսավոր Հայաստան» ու «Բարգավաճ Հայաստան» խմբակցությունների առաջարկով։
«Հույս ունենք, որ կառավարությունից կգա ներկայացուցիչ ու կասի մեզ, թե ինչ է տեղի ունենում և ինչ է արվում հիմա»,– ասաց Մարուքյանը։
Քննարկման ավարտին նախատեսվում է ընդունել ուղերձ` ուղղված միջազգային բոլոր կառույցներին, բոլոր ինստիտուտներին, ԵԱՀԿ ՄԽ անդամ երկրներին, համանախագահ երկրներին` ռազմագերիների հարցը շուտափույթ լուծելու համար։
«Այդ մակարդակի քայլ դեռևս չի արվել Հայաստանից։ Եղել են կոչեր` քաղաքական ուժերի, մտավորականների, մեր առանձին նամակներ, բայց սա ԱԺ–ի ուղերձ է լինելու»,– մեկնաբանեց Մարուքյանը։
Զգայուն խնդիր է և հրատապ լուծման կարիք ունի. ՀՀ ԱԳ նախարարը խոսեց գերիների վերադարձի մասին
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին Լեռնային Ղարաբաղում ռազմական գործողությունների դադարեցման վերաբերյալ։
Հայտարարությունը նախատեսում է նաև գերիների փոխանակման գործընթաց, բայց ժամկետները հստակեցված չեն։
