ՀՀ առողջապահության նախարար Արսեն Թորոսյանը Sputnik Արմենիային հայտնեց, որ ռուսական «Սպուտնիկ V» պատվաստանյութով կորոնավիրուսի դեմ պատվաստվելուց հետո իրեն լավ է զգում:
«Չնայած, որ պատվաստվելու երեկոյան ինձ մի փոքր թույլ էի զգում, ինչը բնորոշ է ադենովիրուսային հիմքով պատվաստանյութերին: Այսինքն՝ նորմալ ընթացք է եղել»,- ասաց Թորոսյանը՝ հավելելով, որ այսօր առավոտից արդեն լավ է զգում:
Մեկ շաբաթից պատրաստվում է երկրորդ դեղաչափն ընդունել, ինչը պարտադիր է «Սպուտնիկ V» պատվաստանյութով բուժման պարագայում:
Նախարարը նաև պատմեց, որ իրենից բացի պատվաստում է ստացել նաև տեղակալը՝ Արտյոմ Սմբատյանը, որն ավելի թեթև է տարել պատվաստումն ու որևէ գանգատ չի ունեցել:
«Ես ինձ համար որոշել էի, որ առաջին իսկ հնարավորության դեպքում կպատվաստվեմ կորոնավիրուսի դեմ, և այնպես ստացվեց, որ առաջին հնարավորությունը եղավ ռուսական «Սպուտնիկ V» պատվաստանյութով: Հավանաբար տեղյակ եք, որ մենք մի փոքր խմբաքանակ նվեր ստացանք ՌԴ առողջապահության նախարարից, որն այցելել էր Հայաստան: Մենք ևս մի փոքրիկ խմբաքանակի պայմանավորվածություն ունենք: Եվ իհարկե շարունակական բանակցություններ են ընթանում նաև այլ խմբաքանակների մատակարարման շուրջ ու ոչ միայն «Սպուտնիկ V»-ի, այլև «Էպիվակկորոնա» պատվաստանյութի, որը մեկ այլ մեխանիզմով է արտադրվել ու այլ գերատեսչության կողմից»,- ասաց Թորոսյանը:
Իսկ մինչ այդ Հայաստան բերված երկու փոքրիկ խմբաքանակները, նախարարի խոսքով, կբավարարեն միայն տասնյակ մարդկանց: Դրա համար նախարարությունը պատվաստման ինչ-որ հատուկ կարգ չի մշակում՝ դա թողնելով կամավորության սկզբունքի վրա:
Իսկ ավելի զանգվածային պատվաստումները, Թորոսյանի հաշվարկով, Հայաստանում կմեկնարկեն թերևս գարնան կեսին:
«Մենք նախնական պատվիրել ենք բնակչության 10 տոկոսի չափով պատվաստանյութ, և այն սկզբնական փուլում օգտագործվելու է խրոնիկ հիվանդություններ ունեցող քաղաքացիների, տարեցների համար, որոնք ավելի մեծ ռիսկ ունեն հիվանդության ծանր ընթացքի: Դրանից հետո արդեն քանակները շարունակաբար կավելացվեն»,- ասաց Թորոսյանը՝ հավելելով, որ կորոնավիրուսի պատվաստումները ՀՀ քաղաքացիների համար անվճար են լինելու, ինչպես մնացած բոլոր պատվաստանյութերը:
Ինչ վերաբերում է կորոնավիրուսի համավարակին, այն Հայաստանում շարունակում է մնալ լարված, բայց մի փոքր ավելի բարվոք վիճակագրությամբ, սակայն շարունակում են պահպանվել նույն տեմպով:
«Կարծես թե ամեն օր արձանագրվում են նույն թվերը: Իհարկե, լավ է, որ թվերը ցածր են, բայց վատ է, որ մենք չենք տեսնում նվազում: Հետևաբար պետք է նորից ջանքեր գործադրենք իջեցման համար»,- ասաց Թորոսյանը:
Նախարարի խոսքով` այսօր հոսպիտալացման հերթի սպասող քաղաքացիներ չկան, բայց հիվանդության մահացության դեպքերը 1.5-2% են կազմում. որքան բարձր է հիվանդության տարածումը, այնքան բարձր է նաև ցավալի դեպքերի վիճակագրությունը:
Համավարակի երկրորդ պիկը Հայաստանում գրանցվել էր նոյեմբերի առաջին շաբաթվա ընթացքում, ու թեև այսօր նվազում է արձանագրվում, բայց Թորոսյանը չի բացառում, որ առջևում էլի պիկեր կան:
«Հաշվի առնելով սուր շնչառական վարակների բնույթը՝ չի բացառվում ալիքաձև ընթացքը, այսինքն, որ կլինի երրորդ պիկ, չորրորդ պիկ, մինչև որ համատարած վակցինացիայի շնորհիվ այն կդառնա սովորական սեզոնային վարակ»,- ասաց Թորոսյանը:
Հիշեցնենք` Ռուսաստանն աշխարհում առաջինն է գրանցել Covid-19–ի դեմ պատվաստանյութը, որը ստեղծել են Գամալեայի կենտրոնը և Ուղիղ ներդրումների ռուսական հիմնադրամը։ Այն ստացել է «Սպուտնիկ V» անվանումը։ Առաջին խմբաքանակն արդեն շրջանառության մեջ է դրվել և Ռուսաստանի մարզեր է մատակարարվում։
Նոյեմբերի 21-ին Հայաստան էր ժամանել Ռուսաստանի միջգերատեսչական պատվիրակությունը, որում նաև առողջապահության ոլորտի ներկայացուցիչներ էին ընդգրկված։ Ռուսաստանի առողջապահության նախարար Միխայիլ Մուրաշկոն ՀՀ առողջապահության նախարար Արսեն Թորոսյանին էր փոխանցել կորոնավիրուսի ռուսական պատվաստանյութի` «Սպուտնիկ V»-ի առաջին նմուշները։
Ալինա Նիկողոսյանը նոյեմբերի 23-ին Sputnik Արմենիային հայտնել էր, որ Հայաստանին տրամադրված «Սպուտնիկ V» պավաստանյութի օրինակները կօգտագործվեն մի քանի կամավորների պատվաստելու համար։
