ԵՐԵՎԱՆ, 1 դեկտեմբերի - Sputnik. «Լուսավոր Հայաստան» խմբակցությունը Ազգային ժողովում դեկտեմբերի 7-ին խորհրդարանական լսումներ կանցկացնի, որի օրակարգում խմբակցության ներկայացրած «Հայաստանի Հանրապետությունում ստեղծված իրավիճակից դուրս գալու գործողությունների ծրագիր սահմանելու մասին» ԱԺ հայտարարության նախագծի քննարկումն է: Այս մասին տեղեկանում ենք ԱԺ կայքից։
Նախագիծը բաղկացած է 13 կետից, որոնցից առաջինը պահանջում է վարչապետ Նիկոլ Փաշինյանի հրաժարականը։
Մյուս կետերով առաջարկվում է խորացնել Հայաստանի և Ռուսաստանի միջև հարաբերությունները, բանակցություններ վարել ԼՂ վերաբերյալ եռակողմ հայտարարության անորոշ դրույթների շուրջ, զբաղվել զոհվածների ընտանիքների, անհայտ կորածների, գերեվարվածների, վիրավորների, արցախահայերի խնդիրներով, հրավիրել միջազգային դոնորների համաժողով և փորձել ներգրավել ֆինանսական օգնություն Հայաստանի և Արցախի վերականգնման համար (ԼՀԿ-ի կարծիքով՝ անհրաժեշտ է առնվազն 1 մլրդ դոլար), կազմել բանակի և տնտեսության վերականգնման ծրագիր, դիմել միջազգային դատական ատյաններ Հայաստանի խախտված իրավունքների համար և թափանցիկ խորհրդարանական արտահերթ ընտրություններ անցկացնել։
ԼՀԿ ղեկավար Էդմոն Մարուքյանը Facebook-ում նշել է, որ լսումներին մասնակցելու և ելույթներ ունենալու համար պետք է նամակ ուղարկել brightarmenia@parliament.am հասցեին մինչև դեկտեմբերի 5-ը կամ զանգահարելով 011 513 423 հեռախոսահամարով։
Ղարաբաղում գերիների և զոհվածների մարմինների փոխանակման գործընթացն արագ կարվի. Լավրով
Նշենք, որ ԼՂ վերաբերյալ եռակողմ հայտարարությունից հետո 16 ընդդիմադիր կուսակցություններ (սկզբում 17-ն էին՝ ներառյալ «Ալյանսը» - խմբ․) հանրահավաքներ են անցկացնում վարչապետ Նիկոլ Փաշինյանի հրաժարականի պահանջով։ «Լուսավոր Հայաստանը» չի միացել հանրահավաքներին, սակայն նույնպես պահանջում է վարչապետի հրաժարականը՝ կիրառելով պայքարի այլ մեթոդներ։
