ԵՐԵՎԱՆ, 30 նոյեմբերի – Sputnik. ՀՀ տնտեսական մրցակցության պաշտպանության պետական հանձնաժողովը Հայաստանում հայտարարված ռազմական դրություն ընթացքում, սեպտեմբերի 27-ից սկսած խոշոր առևտրային ցանցերում իրականացրել է շուրջ 31 ապրանքային խմբերի ամենօրյա մշտադիտարկում:
Այդ ապրանքատեսակների գների թանկացումը վերլուծելու համար ուսումնասիրվել են դրանց մեծածախ, մանրածախ գներն ու միջազգային գների դինամիկան: Ուսումնասիրության արդյունքում արձանագրվել է շաքարավազի իրացման գնի 6-7% բարձրացում, «Նոր Զելանդական» և «Անքոր» տեսակների կարագի իրացման գնի մինչև 1% բարձրացում, արևածաղկի և եգիպտացորենի ձեթերի որոշակի տեսակների գների 2-7% բարձրացում։
Հանձնաժողովը եզրակացրել է, որ այդ ապրանքների իրացման գների բարձրացումն առավելապես պայմանավորված է մի շարք օբյեկտիվ գործոններով, մասնավորապես՝ ներմուծման գների բարձրացմամբ, դրամի արժեզրկմամբ, միջազգային գների բարձրացմամբ և այլն:
Այսպես, օրինակ, ձեթի 1 տոննայի գինը միջազգային շուկայում, ըստ հանձնաժողովի, միայն հոկտեմբերի ընթացքում բարձրացել է 200 դոլարով, այսինքն՝ ձեթի 1 լիտրը թանկացել է 20 ցենտով կամ շուրջ 100 դրամով:
Վերջին 2 ամսվա ընթացքում Հայաստանում թանկացած ալյուրի և ձվի գների ուսումնասիրության արդյունքները ՏՄՊՊՀ-ն կներկայացնի ավելի ուշ:
Դրամի արժեզրկումը ոչ թե տնտեսական, այլ հոգեբանական հիմք ունի. Թունյան
