ԵՐԵՎԱՆ, 30 նոյեմբերի – Sputnik. Ռազմարդյունաբերության ոլորտում այսօր ունեցած արդյունքներն ամենևին էլ գոհացուցիչ չեն։ Նման կարծիք է հայտնել ՀՀ վարչապետ Նիկոլ Փաշինյանը, որը կառավարությունում Ռազմարդյունաբերության կոմիտեի նիստ է հրավիրել։ Տեղեկությունը հայտնում է վարչապետի մամուլի ծառայությունը։
«2015-ին Հայաստանում «Ռազմարդյունաբերական համալիրի» մասին օրենքի ընդունումից հետո ռազմարդյունաբերությունը մեր երկրի ամենաշատ քննարկվող թեմաներից մեկն է: Բայց, ըստ էության, մենք կարող ենք արձանագրել, որ այն արդյունքները, որ այսօր ունենք, ամենևին գոհացուցիչ չեն, որովհետև, ցավոք, մեզ չի հաջողվել հասնել այնպիսի համակարգերի ձևավորման, որ կարողանանք ասել, որ ռազմաարդյունաբերական համալիրը կայացել է»,–ասել է Փաշինյանը։
Նրա խոսքով` նոր իրադրության բերումով, պետք է ամփոփեն նախորդ շրջանի կատարվածը, բացթողումները և հասկանան` ինչպիսի իրատեսական ծրագրեր կարող են ունենալ ռազմարդյունաբերության ոլորտում։
Ռազմարդյունաբերական համալիրը, ըստ Փաշինյանի, պետք է կարողանա երկրի տնտեսության և արդյունաբերության տանող շարժիչ ուժը դառնալ և, մյուս կողմից, ապահովի անվտանգության մեր կարիքները ժամանակակից մարտահրավերներին համապատասխան:
Բարձր տեխնոլոգիական արդյունաբերության նախարար Հակոբ Արշակյանը հանդես է եկել զեկուցումով՝ ռազմարդյունաբերական համալիրի կողմից կատարված աշխատանքների և ընթացիկ վիճակի վերաբերյալ:
Առաջնահերթություն են համարվել կրթության համակարգի բարեփոխումները և ռազմարդյունաբերական համալիրի համար անհրաժեշտ մասնագետների պահանջարկի համալրման ուղղությամբ աշխատանքները:
Ներկայացվել է 2020-2021թթ. հատուկ գիտահետազոտական և փորձակոնստրուկտորական աշխատանքների ցանկը:
Ռազմարդյունաբերական ընկերություններն աշխատում են 24/7 ռեժիմով
