ԵՐԵՎԱՆ, 27 նոյեմբերի – Sputnik․ ՀՀ արտգործնախարար Արա Այվազյանն այսօր հանդիպել է Ֆրանսիայից արցախահայությանն ուղարկված մարդասիրական օժանդակության չվերթն ուղեկցող պատվիրակության ղեկավար, Ֆրանսիայի արտաքին գործերի պետքարտուղար Ժան-Բատիստ Լըմուանի հետ։ Տեղեկությունը հայտնում է ԱԳՆ մամուլի ծառայությունը։
Նախարարը շնորհակալություն է հայտնել Ֆրանսիայի կառավարությանն ու ժողովրդին այս ճակատագրական ժամանակաշրջանում արցախահայության կողքին լինելու համար։
«Հանդիպմանը Հայաստանի ԱԳ նախարարը և Ֆրանսիայի պետքարտուղարը շեշտեցին Արցախում ստեղծված մարդասիրական ճգնաժամի հասցեագրման, տեղահանված արցախահայության՝ հայրենիք վերադարձի համար պայմանների ապահովելու և նրանց իրավունքների պաշտպանելու ուղղությամբ քայլերի հրատապությունը»,- նշված է հաղորդագրության մեջ։
Այվազյանն անդրադարձել է Թուրքիայի ծավալապաշտական նկրտումներին Հարավային Կովկասում։ Նրա գնահատմամբ՝ դրանք տարածաշրջանային անվտանգության և կայունության խաթարման հիմնական գործոնն են: Զրուցակիցներն ընդգծել են Թուրքիայի կողմից տարածաշրջան տեղափոխված օտարերկրյա զինյալ ահաբեկիչներին դուրս բերելու կարևորությունը միջազգային և տարածաշրջանային անվտանգության տեսանկյունից:
Արտգործնախարարն ու պետքարտուղարը մտքեր են փոխանակել ԵԱՀԿ Մինսկի խմբի համանախագահության շրջանակներում արցախահայության իրավունքների և շահերի հասցեագրման շուրջ: Այս համատեքստում Այվազյանը կարևորել է Արցախի ժողովրդի ինքնորոշման իրավունքի ճանաչումը՝ որպես անհրաժեշտ պայման իր պատմական հայրենիքում ազատ, անվտանգ և արժանապատիվ ապագա կառուցելու համար:
Նշենք, որ նոյեմբերի 22-ին Ֆրանսիան մարդասիրական առաջին ինքնաթիռն էր ուղարկել Հայաստանի և Արցախի համար։ Երևան էին տեղափոխվել դեղեր, բժշկական սարքավորումներ՝ հանրապետության առողջապահական համակարգին աջակցելու համար։ Նույն ինքնաթիռով բերվել էին նաև առաջին անհրաժեշտության պարագաներ՝ Արցախից բռնի տեղահանված բնակիչների համար։
Ավելի վաղ Ֆրանսիայի ԱԳՆ պաշտոնական ներկայացուցիչը հայտնել էր, որ Փարիզն Արցախի հայ բնակչության համար երեք ուղղություններով օգնության համալիր ծրագիր է գործարկում:
Ծրագրերի համակարգումն իրականացվելու է հատուկ կոմիտեի, ինչպես նաև ԱԳՆ ճգնաժամային կենտրոնի կողմից, մոբիլիզացվելու են պետական կառույցները, Հայաստանի հետ համագործակցող համերաշխության ասոցիացիաները, Coordination Sud կազմակերպության մեջ մտնող մարդասիրական ասոցիացիաները։
