ԵՐԵՎԱՆ, 27 նոյեմբերի – Sputnik. Դեպի Սոթքի ոսկու հանքավայր տանող ճանապարհն այսօր առավոտից փակ է: Այս մասին Սոթքից հաղորդում է Spunik Արմենիայի թղթակիցը: Sputnik Արմենիայի նկարահանող խմբին ևս թույլ չեն տվել հասնել հանքավայր: Սոթք գյուղի վերջնամասում, դեպի Քարվաճառ ու դեպի հանքի տարածք գնացող ճանապարհին այս պահին կանգնած են ՀՀ ոստիկանության ու ռազմական ոստիկանության ավտոմեքենաներ ու աշխատակիցներ, որոնք բացի զինվորականներից ու հանքի աշխատակիցներից, այլ անձանց թույլ չեն տալիս շարունակել ճանապարհը դեպի ոսկու հանք:
![Սոթքի ոսկու հանքավայր տանող ճանապարհը փակ է. ինչ իրավիճակ է հիմա այդ տարածքում Սոթքի ոսկու հանքավայր տանող ճանապարհը փակ է. ինչ իրավիճակ է հիմա այդ տարածքում - Sputnik Արմենիա](https://cdn.am.sputniknews.ru/img/07e4/0b/1b/25519948_0:0:1600:1067_600x0_80_0_0_1a7b4facbe0a9f6b7b8afd2f20b32c6e.jpg)
Ոսկու հանքավայրի աշխատակիցներին տրվել են հատուկ թույլտվություններ՝ պահակետերով անցնելու համար:
Գեղարքունիքի խոշորացված Գեղամասար համայնքի (որի կազմի մեջ է նաև Սոթքը) ղեկավար Հակոբ Ավետյանը Sputnik Արմենիային պատմել է, որ գիշերը Սթոքում խաղաղ է անցել:
«Գիշերը շատ խաղաղ է եղել, ոչ մի գործողություն չի արվել, ոչ մի հրաձգություն չի եղել»,-ասել է գյուղապետը՝ մեկնաբանելով մամուլում առկա լուրերը, թե Սոթքում գիշերը պայթյունի ձայներ են լսվել:
Ադրբեջանցի զինծառայողները Սոթքի ոսկու հանքի մատույցներում են. տեսանյութ
Ավետյանի խոսքով` այս հարցը պետք է որոշվի կառավարության մակարդակով: «Սպասում ենք, տեսնենք մեր հարցն ինչ է լինում»,- ասաց նա: Իսկ մինչ այդ հանքն այսօր, իր տեղեկություններով նորմալ աշխատում է։
Այսօր առավոտյան ոսկու հանք աշխատանքի գնացողները Sputnik Արմենիայի թղթակցին պատմել են, որ իրենց գիշերվա հերթափոխին նախապես ասվել էր, որ անցած գիշերն աշխատանքի չգնան, բայց այսօր ցերեկվա հերթափոխին արդեն կանչել են աշխատելու:
![Սոթքի ոսկու հանքավայր տանող ճանապարհը փակ է. ինչ իրավիճակ է հիմա այդ տարածքում Սոթքի ոսկու հանքավայր տանող ճանապարհը փակ է. ինչ իրավիճակ է հիմա այդ տարածքում - Sputnik Արմենիա](https://cdn.am.sputniknews.ru/img/07e4/0b/1b/25520145_0:0:1600:1067_600x0_80_0_0_0d49a656faffe1001d40054e0b0948f2.jpg)
«Ես երեկ գիշերը պիտի հերթափոխի լինեի, բայց մեր տղերքը զանգեցին, աsեցին՝ էլ չգաս, թուրքերը եկել են, մտել հանք, ասում են մերն 1 էս տարածքը: Ասեցին՝ եկել են, հիմա այստեղ են, 80 հոգուց ավել մարդիկ են»,- ասաց Սոթքի բնակիչ, հանքավայրի աշխատակից Գրիգոր Արզումանյանը:
![Սոթքի ոսկու հանքավայր տանող ճանապարհը փակ է. ինչ իրավիճակ է հիմա այդ տարածքում Սոթքի ոսկու հանքավայր տանող ճանապարհը փակ է. ինչ իրավիճակ է հիմա այդ տարածքում - Sputnik Արմենիա](https://cdn.am.sputniknews.ru/img/07e4/0b/1b/25519932_0:0:1600:1067_600x0_80_0_0_301d57e1d446345e5938eba16bb725d3.jpg)
Նա նաև նշեց, որ այսօր գիշերն ինքը դարձյալ հերթափոխի է ու հիմա զանգի է սպասում` հասկանալու համար՝ գնալու է աշխատանքի, թե ոչ:
Աշխատակիցների ու գյուղի բնակչների խոսքով` ադրբեջանցիներն երեկ անցնել են Քարվաճառում տեղադրված դարպասը, անցել ավտոճանապարհի ոլորաններով ու անարգել հասել հանքավայրի տարածք:
![Սոթքի ոսկու հանքավայր տանող ճանապարհը փակ է. ինչ իրավիճակ է հիմա այդ տարածքում Սոթքի ոսկու հանքավայր տանող ճանապարհը փակ է. ինչ իրավիճակ է հիմա այդ տարածքում - Sputnik Արմենիա](https://cdn.am.sputniknews.ru/img/07e4/0b/1b/25520135_0:0:1600:1067_600x0_80_0_0_015b120e7eecc6e3de39498ab5233498.jpg)
«Ադրբեջանցիներն եկել են՝ տանկով, կամազներով, ջարդել են այդ դարպասը, անցել են մեր տարածք: Հիմա Սոթքի հանքի ամբողջ տարածքը իրենց տիրապետության տակ է»,- ասաց Վարդան Հայրապետյանը, ում որդին հանքավայրի աշխատակից է:
Նրա խոսքով` տարածքի բնակչության շուրջ 30-40%-ն աշխատում ու ապրում է հանքի շնորհիվ ու մտավախություն ունեն, որ աշխատանքից զրկվելու դեպքում ապրուստի այլ միջոց չեն ունենա:
Սոթքում հանդիպած հովիվն էլ վստահեցնում է, որ անկախ իրավիճակից, իրենք շարունակելու են ապրել իրենց գյուղում ու չեն պատրաստվում հեռանալ հայրենի հողից:
Sputnik Արմենիայի թղթակիցը հանքավայրի ու տեղի բնակչության հետ զրույցներից եզրակացնում է, որ այս պահին իրավիճակը հանգիստ է, խուճապ չկա, մարդիկ գյուղում զբաղված են իրենց առօրյա գործերով:
Հիշեցնենք, որ երեկ մամուլում լուրեր էին շրջանառվում, որ ադրբեջանական զինվորները մտել են Սոթքի հանքավայր և աշխատակիցներին ժամանակ տվել դուրս գալու համար: ՀՀ պաշտպանության նախարարությունը հերքել էր այդ լուրը։ Գեղամասար խոշորացված համայնքի (որտեղ ներառված է նաև Սոթքը) ղեկավար Հակոբ Ավետյանը Sputnik Արմենիայի հետ զրույցում հայտնել էր, որ ադրբեջանցիները Սոթքի հանքի տարածքում են` բանակցություններ են վարում։