ԵՐԵՎԱՆ, 27 նոյեմբերի – Sputnik. Պատերազմական գործողությունների հետևանքով ամեն ժամը և ամեն րոպեն անհետ կորածների հարցում կարող են լինել ճակատագրական։ Սակայն, ցավոք, կան հարցեր, որոնք կախված են ոչ միայն Հայաստանից։ Իր տեսաուղերձում նման հայտարարություն արեց ՀՀ վարչապետ Նիկոլ Փաշինյանը։
«Այս օրերին հարյուրավոր անհետ կորածների ծնողների հետ եմ հանդիպել ու զրուցել. նրանք ճիշտ են, սակայն կան հարցեր, որոնք միայն մեզնից չեն կախված։ Սակայն պետք է զբաղվենք գերիների հարցերով ու գտնենք այն տղաներին, որոնք միգուցե դեռ պատսպարված են ինչ–որ տեղ»,–ասաց Փաշինյանը։
Նրա խոսքով` նոյեմբերի 9-ի պայմանավորվածությունների մեջ կան կետեր, որոնք խնդրահարույց են, սակայն հիմա դիվանագիտական աշխատանքներ են գնում, և այդ հարցերի լուծումը կգտնվի անպայմանորեն։ Փաշինյանը նշեց` այդ պայմանավորվածությունների մեջ է մտնում նաև տրանսպորտային կոմունիկացիաների վերաբացումը տարածաշրջանում։ Խնդիր, որի լուծումը, ըստ վարչապետի, կփոխի Հայաստանի կերպարը։
Փաշինյանը ներողություն է խնդրել գերեվարված ու անհետ կորած անձանց ընտանիքների անդամներից
Փաշինյանն ասաց նաև, որ անցյալին դեռ կանդրադառնան, սակայն այսօր շատ ավելի կարևոր է խոսել ապագայի մասին։ Ըստ նրա`այսօր շատ կարևոր է ձեռքբերված խաղաղությունը պահպանելը, այն տևական դարձնելը և եթե հաջողվի` մշտական դարձնելը։
Նա վստահեցրեց` ժողովրդի առաջ ազնիվ են, և այս փորձությունը միասին պետք է հաղթահարվի։
Հիշեցնենք, որ օրերս Փաշինյանն ընդունել էր բողոքի ակցիա անող ծնողներին։ Սակայն ծնողները հայտնել էին` հանդիպումն իրենց չի բավարարել, քանի որ վարչապետն ընդհանուր պատասխաններ է տվել իրենց հարցերին։
Սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։ Նոյեմբերի 9-ին ՀՀ վարչապետ Նիկոլ Փաշինյանի, ՌԴ նախագահ Վլադիմիր Պուտինի ու Ադրբեջանի նախագահ Իլհամ Ալիևի միջև ստորագրված հայտարարության համաձայն` ռազմական գործողությունները դադարեցվեցին։
Նոյեմբերի 20-ի տվյալներով՝ Արցախի ՊԲ-ն հրապարակել է 1678 զոհվածների անունները։
Վերջին տվյալներով` քաղաքացիական անձանց շրջանում կա 50 զոհ ու 148 վիրավոր։
Անհետ կորածների, գերիների ու վիրավորների մասին պաշտոնական տվյալներ չկան։
Բողոքի ակցիա` կառավարության մոտ. Փաշինյանը չլսեց անհետ կորած զինվորների ծնողներին
