ԵՐԵՎԱՆ, 25 նոյեմբերի - Sputnik. Վարչապետ Նիկոլ Փաշինյանի որոշմամբ՝ էկոնոմիկայի և արդարադատության փոխնախարարներ ազատվել են աշխատանքից։ Նաիրա Մարգարյանն ազատվել է էկոնոմիկայի նախարարի տեղակալի պաշտոնից, Ռաֆիկ Գրիգորյանը՝ արդարադատության նախարարի տեղակալի։
Նաիրա Մարգարյանը պաշտոնը ստանձնել էր 2019-ի օգոստոսին, Ռաֆիկ Գրիգորյանը՝ 2019-ի հուլիսին։
Էկոնոմիկայի նախարար Տիգրան Խաչատրյանը արդեն հեռացել է պաշտոնից, սակայն արդարադատության նախարար Ռուստամ Բադասյանը շարունակում է պաշտոնավարել։
Վերջին օրերին կառավարությունում իրենց պաշտոններին հրաժեշտ են տվել վեց նախարարներ` ԿԳՄՍ նախարար Արայիկ Հարությունյանը, ՊՆ ղեկավար Դավիթ Տոնոյանը, աշխատանքի և սոցապ նախարար Զարուհի Բաթոյանը, ԱԻՆ ղեկավար Ֆելիքս Ցոլակյանը, ԱԳ նախարար Զոհրաբ Մնացականյանը, էկոնոմիկայի նախարար Տիգրան Խաչատրյանը։
Նշենք, որ պաշտոնյաների ու պատգամավորների հրաժարականները սկսվել են նոյեմբերի 9-ին Հայաստանի, Ռուսաստանի ու Ադրբեջանի ղեկավարների եռակողմ հայտարարությունից հետո։
