ԵՐԵՎԱՆ, 23 նոյեմբերի – Sputnik. Արցախի նախագահի նախկին խորհրդական, «Հենակետ» վերլուծական կենտրոնի ղեկավար Տիգրան Աբրահամյանը հայտնում է, որ Արցախում կան բնակավայրեր, որոնց բնակիչները մինչև հիմա չգիտեն՝ հեռանան իրենց տներից, թե ոչ։
«Մարդիկ ստիպված անձամբ են կապ հաստատում ռուս խաղաղապահների հետ՝ փորձում իրենց կենսական շահերը առաջ մղեն, հասկանան, թե արդյո՞ք իրենց գյուղերը հանձնվող բնակավայրերի շարքում են, թե ոչ, որովհետև պետությունը բացակայում է»,– Facebook–ի իր էջում գրել է նա։
Նա շեշտել է, որ արդեն մի քանի օր է` Արցախի տարբեր գյուղերից անհանգստացնող լուրեր են գալիս այն մասին, որ ադրբեջանական բանակը մուտք է գործում գյուղեր կամ հողատարածքներ, որոնք կա՛մ ստորագրված փաստաթղթով չեն տրվում Ադրբեջանին, կա՛մ եթե տրվում են, ապա տեղի բնակիչներին այդ մասին չի տեղեկացվում, տեղեկացվելու դեպքում էլ՝ տարհանումից 1-2 օր առաջ։
«Համացանցում նույնիսկ տեսանյութեր տարածվեցին, որտեղ երևում է, թե ինչպես են ադրբեջանցի զինծառայողները ծաղրում իրենցից մի քանի մետր այն կողմ գտնվող մեր գյուղացիներին, որոնք իրենց գույքն են բեռնում մեքենաները։ Ցավոք, սրանք 1, 2, 3 դեպքեր չեն, շատ–շատ են։Հետաքրքիր է հասկանալ, թե ի՞նչ են մտածում Հայաստանի և Արցախի իշխանությունները, ովքեր են վերահսկում, ապահովում արցախցիների անվտանգությունը։ Միայն օդի մեջ խոսելով ու անիմաստ գլուխ գովելով հո՞ չի։ Ե՞րբ է այս բարդակը վերանալու։ Ինչո՞ւ եք պատասխանատվությունից փախնում՝ ողջ հոգսը թողելով առանց այդ էլ ծանր վիճակում հայտնված մեր հայրենակիցների վրա»,–նշել է Աբրահամյանը։
Նրա խոսքով` ներկայիս կառավարությունն ամեն կերպ փորձում է պահել իշխանությունը, բայց իրենց գործառույթներն ու պարտականությունները որևէ ձևով չի իրականացնում։
Հիշեցնենք` ՀՀ կառավարությունն այսօր հրապարակեց սեպտեմբերի 27-ին Ադրբեջանի սանձազերծած պատերազմի ու նոյեմբերի 9-ին ստորագրված եռակողմ հայտարարության հետևանքով Ադրբեջանի վերահսկողության տակ անցած հայկական գյուղերի ու քաղաքների ցանկը, ըստ որի` Ադրբեջանի վերահսկողության տակ է անցնում 121 համայնք։
