ԵՐԵՎԱՆ, 23 նոյեմբերի - Sputnik. Արցախի 25-30 հազար քաղաքացիներ կորցրել են իրենց տունն ու բնակավայրը։ Այս թիվը Sputnik Արմենիայի հետ հարցազրույցում հայտնեց ՀՀ աշխատանքի և սոցիալական հարցերի նորանշանակ նախարար Մեսրոպ Առաքելյանը։ Ընդ որում, այս թվի մեջ հաշվառված չեն այն արցախցիները, որոնց տներն ավերվել են հակառակորդի հրետակոծության հետևանքով, բայց տվյալ բնակավայրերը մնացել են հայկական վերահսկողության տակ։
«Այս պահին այդ մասով ճշգրտումներ և գույքագրում է իրականացնում Արցախի կառավարությունը»,– հայտնեց նախարարը։
Մեսրոպ Առաքելյանը հայտնեց, որ ՀՀ կառավարությունը հոգում է Հայաստանում ժամանակավոր բնակություն հաստատած անտուն մնացած արցախցիների կեցության ու սոցիալական խնդիրները։
«Կան հիմնականում երկու խմբի մարդիկ. արցախցիներ, որոնց թողած բնակարանները մնացել են հայկական կողմի վերահսկողության ներքո և անձինք, որոնց կեցության վայրերն արդեն անցել են ադրբեջանցիների ենթակայության տակ, և նրանք Հայաստանում հաստատվել են իրենց բարեկամների տանը կամ հյուրանոցներում ու կացարաններում»,– ասաց նախարարը։
Արցախցիները տուն են վերադառնում, իսկ այլևս տուն չունեցողները՝ բարի ճանապարհ մաղթում նրանց
Առաքելյանը վստահեցրեց, որ կառավարությունը հաշվի է առնելու Հայստանում հաստատված արցախցիների ցանկությունը` կապված բնակության վայրի ընտրության հետ։
«Հաշվի առնելով այն կորուստը, որն իրենք արդեն ապրել են, մենք թողնելու ենք, որ յուրաքանչյուր ընտանիք ինքն ընտրի իր կեցության վայրը` սկսած այն բանից, թե Հայաստանի որ տարածքում է ուզում, ինչ տուն է ուզում։ Այսինքն` մենք այդ մասով որևիցե էական սահմանափակումներ չենք դնելու։ Այսինքն` մարդիկ իրենք են ընտրելու որտեղ բնակվեն` դա կլինի վարձով տուն, բնակարան, բնակելի տուն, հյուրատուն, մենք ընդամենը իրականացնելու ենք որոշակի ծախսերի փոխհատուցում»,– ասաց Առաքելյանը։
Նախարարը կարևորում է նաև ավելորդ թղթաբանությունից խուսափելու հանգամանքը, որպեսզի մարդիկ հնարավորինս արագ, առանց ավելորդ քաշքշուկների ստանան իրենց աջակցությունը։
Նախարարը հայտնեց, որ հաշվի առնելով ջեռուցման սեզոնային ծախսերը` կառավարությունը նաև որոշում է կայացրել փոխհատուցելու արցախցիներին հյուրընկալած հյուրանոցների, հյուրատների կոմունալ ծախսերը։
Օրեր առաջ ԱԺ–ի կողմից հավանության արժանացած 2021թ–ի պետական բյուջեն կազմվել է մինչև սեպտեմբերի 27-ը, հետևաբար դրանում պատերազմի հետևանքով առաջացած ծախսերը հաշվարկված չեն։ Ուստի աշխատանքի և սոցիալական հարցերի նախարարից հետաքրքրվեցինք`արդյոք պետական միջոցները կբավարարեն այս լրացուցիչ բեռը կրելու համար։
Փախստականներին Ստեփանակերտ տեղափոխող ավտոբուսների հերթական շարասյունը տեղ է հասել
Մեսրոպ Առաքելյանը հայտնեց, որ ծախսերի մի մասը նախատեսվում է իրականացնել «Հայաստան» համահայկական հիմնադրամի համաֆինանսավորմամբ։ Բացի այդ, հաջորդ տարվա բյուջեում, ըստ նրա, արդեն իսկ որոշակի փոփոխություններ են արվում։
«Ծախսային մասով մենք արդյունավետ վերաբաշխումների միջոցով խնդիրներ չենք առաջացնի նաև ՀՀ այն քաղաքացիների նկատմամբ, ովքեր պետության կողմից ստանում են սոցիալական աջակցություն` կենսաթոշակներ, նպաստներ»,– եզրափակեց նախարարը։
