Sputnik Արմենիայի նկարահանող խումբը Ակնայում էր (Աղդամ)` քաղաքի հայկական տիրապետության տակ լինելու վերջին օրը։ Հեռացող քաղաքը տխուր տեսք ուներ։
Արցախյան առաջին պատերազմում ազատագրված պատմական Ակնա քաղաքը (ադրբեջանական պաշտոնական անվանումն է՝ Աղդամ) եռակողմ հայտարարության արդյունքում այսօր` նոյեմբերի 20–ին, հանձնվել է Ադրբեջանին։
Պատմական աղբյուրները վկայում են, որ դեռևս մ.թ.ա. 1-ին դարում՝ Տիգրան Մեծի օրոք, Ակնայի մոտ հիմնադրվել է Տիգրանակերտ բերդաքաղաքը։
Արցախյան պատերազմի ընթացքում Աղդամը Ադրբեջանի զինված ուժերի համար կարևորագույն հենակետ էր, որտեղից հրթիռակոծում էին Արցախի մայրաքաղաք Ստեփանակերտը և հարակից այլ բնակավայրեր։
1993 թվականի հուլիսի 4-ից 24-ն ընկած ժամանակահատվածում տեղի ունեցած ռազմական գործողության արդյունքում Աղդամի վերահսկողությունն անցնում է հայկական զինված ուժերի վերահսկողության ներքո։
Ակնայի տարածքում է գտնվում Ջումա մզկիթը, որն ընդգրկված է Արցախի Հանրապետության պետական պահպանության ներքո գտնվող հուշարձանների ցանկում։ Այն հիմնադրվել է 1870 թվականին և չի ավերվել այն տարիների ընթացքում, երբ Ակնան եղել է Արցախի վերահսկողության ներքո։
