ԵՐԵՎԱՆ, 19 նոյեմբերի - Sputnik. ՌԴ արտգործնախարար Սերգեյ Լավրովը հայտարարել է, որ Մոսկվան, Ղարաբաղի հակամարտության կարգավորման շուրջ պայմանավորվածության հասնելիս, չի խախտել ՀԱՊԿ-ի գծով իր պարտավորությունները։
«Մի կողմից (պնդում են. խմբ) «Ռուսաստանը գրեթե բոլորին խաբել է և դարձել գլխավոր շահառուն»: Իսկ մյուս բևեռում «Ռուսաստանը դավաճանել է իր դաշնակիցներին»։ Ընդ որում` դուք տեսնում եք, թե տեղի ունեցածը որքան անազնիվ են մեկնաբանում նաև մեր` ռուսական քաղաքագիտական միջավայրում», - ասել Է Լավրովը RT հեռուստաալիքին տված հարցազրույցում։
Նախարարը նշել է, որ որոշ վերլուծաբաններ ուղղակիորեն մեղադրում են Հավաքական անվտանգության պայմանագրի վերաբերյալ պարտավորությունների դավաճանության մեջ:
«Նախ` չեմ կարծում, որ մարդիկ (իսկ ես գիտեմ նրանց ազգանունները) պարզապես քաղաքականապես ու իրավաբանորեն անգրագետ են։ Երկրորդ՝ նրանք չեն կարող չիմանալ, որ ՀԱՊԿ-ի պարտավորությունները տարածվում են բացառապես ՀԱՊԿ անդամ երկրին արտաքին ագրեսիայից պաշտպանելու վրա, ինչը, իհարկե, տեղի չի ունեցել Հայաստանի հետ։ Նման օրինակները շատ են։ Դրանք թողնում եմ արտասահմանում և Ռուսաստանի Դաշնությունում եղած հեղինակների խղճի վրա», - նշել է Լավրովը։
«Հիմա, ըստ ամենայնի, մեր մոլի ընդդիմադիրների համար բոլոր միջոցներն էլ լավն են՝ ընդհուպ մինչև փաստերի բացահայտ վերադասավորում։ Մենք կաշխատենք մեր արտաքին քաղաքականության իրականացման ուղղությամբ, որը սահմանված է նախագահի կողմից և վայելում է մեր քաղաքացիների լայն աջակցությունը` դատելով հարցումներից, այդ թվում` RT-ի», - հավելել Է նախարարը:
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորակազմ ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորախումբը տեղակայմանը զուգահեռ դուրս են բերվում հայկական զինված ուժերը։ Ռուսաստանի Դաշնության խաղաղապահ զորակազմը տեղակայվում է 5 տարի ժամկետով` 5 տարվա ժամանակահատվածով ավտոմատ երկարաձգմամբ, եթե կողմերից որևէ մեկը ժամկետի ավարտից 6 ամիս առաջ չհայտարարի այդ դրույթի կիրառումը դադարեցնելու մտադրության մասին:
