ԵՐԵՎԱՆ, 19 նոյեմբերի - Sputnik. «Բարգավաճ Հայաստան» խմբակցության պատգամավորներն այսօր ԱԺ-ում, լրագրողների հարցերին ի պատասխան հայտարարեցին, որ ՌԴ արտաքին հետախուզության ծառայության տնօրենի երեկվա հայտարարությունը ո՛չ իրենց, ո՛չ Փաշինյանի հրաժարականը պահանջող մյուս կուսակցություններին չի ուղղված:
«Ես կարծում եմ, որ մեզ ուղղված չէ: Մենք ասում ենք, որ եղել է պարտություն, և դա պետք է սառնասիրտ ու պարզ ճակատով ասել՝ եղել է պարտություն»,- ասաց ԲՀԿ պատգամավոր Միքայել Մելքումյանը:
Նույն խմբակցության պատգամավոր Շաքե Իսայանն էլ ավելացրեց, որ այդ հայտարարությունն ուղղված էր այն ուժերին, որոնք սպասարկում են արևմտյան շահի.
«Նիկոլ Փաշինյանը չի տիրապետել իրավիճակին, կամ տիրապետելով՝ սպասարկել է որոշ արևմտյան ուժերի, և ես կարծում եմ, որ, այո՛, Նիկոլ Փաշինյանը, սպասարկելով որոշ ուժերի, դավաճանել է հայի շահն ու ստորագրել այդ խայտառակ կապիտուլյացիայի պայմանագիրը»:
Պատգամավորը խորհուրդ տվեց ավելորդ անգամ ինտրիգներ չմտցնել ԲՀԿ-ի ու նրա ռուս գործընկերների՝ «Եդինայա Ռոսիյա» կուսակցության միջև:
Նշենք, որ Ռուսաստանի արտաքին հետախուզության ծառայության (ԱՀԾ) տնօրեն Սերգեյ Նարիշկինը հայտարարել էր, որ ԱՄՆ–ն ու ՆԱՏՕ-ի դաշնակիցները փորձում են պառակտել Հայաստանի և Ադրբեջանի ժողովուրդներին։
ԲՀԿ–ն պահանջում է ժամ առաջ մեկուսացնել Նիկոլ Փաշինյանին
Նրա խոսքով՝ ԱՄՆ-ն ու նրա դաշնակիցները վրդովված են, որ պատերազմը կանգնեցվել է Մոսկվայի միջնորդությամբ։
Նարիշկինի խոսքով` հայերին փորձում են համոզել, որ Լեռնային Ղարաբաղում հաստատված խաղաղությունը Երևանի պարտությունն է, «նետվում» է «պատերազմ մինչև հաղթական ավարտ»-ի անհրաժեշտության մասին գաղափարը։
Ադրբեջանցիներին էլ ասում են, որ Կրեմլը նրանցից գողացել է հաղթանակը, երբ ադրբեջանական բանակին մի քայլ էր մնացել Ստեփանակերտը գրավելուց:
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Ինչ տվեց Արցախի վերաբերյալ եռակողմ հայտարարությունը․ քարտեզ
Շփման գծի երկայնքով Լեռնային Ղարաբաղում և Լաչինի միջանցքում հաստատվում են ռուսական խաղաղապահ ուժեր 1960 զինվորականի չափով, հրազենային զենքով, 90 զրահատրանսպորտային և 380 ավտոմեքենաներով և հատուկ տեխնիկայով։
Խաղաղապահները մնում են հինգ տարի ժամանակով` ավտոմատ երկարացման հնարավորությամբ, եթե հաջորդ հինգ տարվա համար կողմերը ժամկետի լրանալուց վեց ամիս առաջ չեն հայտարարում այս դրույթի կիրառությունը դադարեցնելու մասին։
Թուրքիայի աջակցությամբ Ադրբեջանի սանձազերծած պատերազմի ընթացքում, ըստ վերջին տվյալների, հայկական կողմից զոհվել են 1609 զինծառայողներ։ Քաղաքացիական անձանց շրջանում կա 50 զոհ ու 148 վիրավոր։
