ԵՐԵՎԱՆ, 18 նոյեմբերի -Sputnik. ՀՀ վարչապետ Նիկոլ Փաշինյանի կողմնակիցները` մի քանի տասնյակ զինվորականներ ու քաղաքացիականներ, բողոքի ակցիա են իրականացնում Երևանի Հանրապետության հրապարակում։ Զինվորականներից մեկն ասաց, որ պատերազմի պարտության ողջ մեղքն ընկած է նախկին իշխանությունների ուսերին։
«92 թվականից ամրոցները կառուցելու փոխարեն թող զենք գնեին, որ մեր զինվորները անպաշտպան չմնային անօդաչուների դեմ», - ասաց զինվորականներից մեկը:
Մյուսն էլ պահանջում էր, որ կառավարության շենքում նոյեմբերի 9–ի լույս 10–ի գիշերն ավերածություններ անողները կանգնեն դատարանի առաջ։
«Երբ իրենք ստեղ պատեր էին կոտրում, իմ աչքի առաջ ջահել տղերք էին կոտրվում։ Այդ խուլիգաններն ինչու չեն կանգնել մեր զինվորի կողքին։ Հլը մի հատ էլ հանրահավաք են անում (նույն ժամին Ազատության հրապարակում ընթանում է ընդդիմության հանրահավաքը, որտեղ պահանջում են իշխանությունների հրաժարականը - խմբ.) ։ Հեշտ է ասել։ Գայիք, կռվեիք»,- ասաց նա։
Զինվորականներից մեկն էլ լրագրողներին ասաց` եթե Փաշինյանին դավաճան են համարում, ուրեմն բոլոր զինվորականներն էլ դավաճան են։
«Եթե մեղադրում են իմ վարչապետին, ուրեմն ինձ էլ են մեղադրում ։ Եթե հարձակվում են իմ ԱԺ նախագահի վրա (Արարատ Միրզոյան-խմբ.), ապա հարձակվում են նաև ինձ վրա։ Փաշինյանն իր քայլով փրկեց մեր զինվորներին։ Եվ ով եղել է ռազմի դաշտում, ձեզ կասի, որ դա ճիշտ որոշում էր», - ասաց նա։
Ցուցարարների շարքերում կային նաև մարդիկ, ովքեր մեղադրում են բանակի հրամանատարներին ։
«Գիտեք` ինչ էին ասում կամավորներին Արցախում` հրամանատար գտեք, գնացեք կռվեք։ Եթե ժամկետային զինծառայողները չլինեին, այդ ջոկատները կկոտորվեին։ 18-20 տարեկան զինվորները փրկեցին մեզ», - ասաց զինվորականը:
Փաշինյանը խոսեց Ադրբեջանին փոխանցված բնակավայրերի փախստականների վերադարձի մեխանիզմի մասին
Նշենք, որ ՀՀ վարչապետի աշխատակազմի ղեկավար Էդուարդ Աղաջանյանն այսօր առավոտյան Արցախից վերադարձած զինծառայողներին և կամավորներին կոչ էր արել հրաժարվել կառավարության դիմաց հանրահավաք անցկացնելու գաղափարից:
