ԵՐԵՎԱՆ, 18 նոյեմբերի - Sputnik. ՀՀ գլխավոր դատախազությունը հաղորդագրություն է տարածել, որտեղ մանրամասներ է ներկայացրել նոյեմբերի 10-ին գիշերը ԱԺ–ի ու կառավարության շենքի վրա հարձակում գործած անձանց մահվան վերաբերյալ։
Հիշեցնենք, որ հարձակումներից 2 օր անց հանրության մեջ լուրեր տարածվեցին այն մասին, որ հարձակվող անձանցից մեկին Երևանի Կիևյան կամրջի տակ մահացած են գտել։ Սոցիալական հարթակներում լուրեր էին շրջանառվում այն մասին, որ Գ. Պետրոսյանը ոչ թե ինքնասպանություն է գործել, այլ տեղի է ունեցել սպանություն՝ նրան Կիևյան կամրջից ցած նետելու կամ այլ միջոցով:
Դատախազությունը հաստատում է, որ 2020թ. նոյեմբերի 13-ի երեկոյան Կիևյան կամրջի տակ մահացած հայտնաբերված 27-ամյա Գառնիկ Պետրոսյանն իսկապես զանգվածային անկարգություններ իրականացնողների շարքերում է եղել։
Վարչապետը շարունակում է իր աշխատանքը կատարել կառավարության շենքում. խոսնակ
Դատախազությունը հայտնում է, որ 2020թ.–ի նոյեմբերի 10-ին անկարգությունների փաստով հարուցված քրեական գործով Գառնիկ Պետրոսյանը բերման է ենթարկվել ԱԱԾ, ձերբակալվել է, իսկ նոյեմբերի 13-ին նրան առաջադրվել է մեղադրանք, ու նա ազատ է արձակվել: Նույն օրը միջնորդություն է ներկայացվել Երևան քաղաքի ընդհանուր իրավասության դատարան՝ Գառնիկ Պետրոսյանի նկատմամբ կալանավորումը որպես խափանման միջոց կիրառելու համար:
Վկայակոչելով Պետրոսյանի հարցաքննության արձանագրությունը`դատախազությունը նշում է, որ հարցաքննությունն ԱԱԾ–ում ավարտվել է նոյեմբերի 13-ին, ժամը 21.00-ին, իսկ կամրջից Պետրոսյանը նետվել է 22։04-ին` ըստ գործով ձեռք բերված տվյալների։
Գործով առկա է ականատես վկա, որի ցուցմունքների համաձայն՝ նոյեմբերի 13-ին՝ ժամը 22:00-ի սահմաններում, Կիևյան կամրջի ուղղությամբ զբոսնելիս կամրջի մեջտեղի հատվածում նկատել է, թե ինչպես է նշված անձը միայնակ, բռնվելով դրոշակներից, բարձրացել կամրջի մետաղական արգելապատնեշին, և մինչև ինքը կհասցներ ահազանգել 911 հեռախոսահամարին՝ տեսել է, որ նա այլևս այնտեղ չէ: Դրանից անմիջապես հետո, երկու այլ անձանց հետ կամրջի այդ հատվածի արգելապատնեշից տեսել են ներքևում՝ ճանապարհի երթևեկելի գոտում, ընկած անձի, իսկ իրենց կանչով ժամանած իրավապահ մարմինների ներկայացուցիչների հետ դեպքի վայրում համոզվել են, որ դա կամրջի արգելապատնեշին բարձրացած անձն է:
Իր ցուցմունքում ականատեսը նշել է նաև, որ այդ անձը եղել է միայնակ և առհասարակ կամրջի այդ հատվածի ամբողջ երկայնքով որևէ այլ անձ չի եղել: Գրեթե նույնաբովանդակ ցուցմունքներ են տվել նաև ականատեսի կողմից նշված երկու պատահական անցորդները: Դատախազությունը նշում է, որ նույնն արձանագրել են նաև կամրջին տեղադրված տեսախցիկները։
Արարատ Միրզոյանը ևս մեկ վիրահատության է ենթարկվել
Հաղորդագրության մեջ նաև նշվում է, որ ԱԱԾ–ում հարցաքննության ժամանակ իր պաշտպանի ներկայությամբ տված ցուցմունքում Գառնիկ Պետրոսյանը նշել էր, որ դեռևս 2010թ. կատարել է ինքնասպանության փորձ՝ դեղահաբեր խմելու միջոցով, որից հետո մինչև 2019թ. հաշվառված է եղել հոգեկան առողջության կենտրոնում, այդ ընթացքում ստացել համապատասխան դեղահաբեր, որոնց ընդունումն ինքնակամ, առանց բժշկի ցուցումի, դադարեցրել է 2019թ. հունվարից:
Քրեական գործով նախաքննությունը շարունակվում է:
