Արցախի Հանրապետության մայրաքաղաք Ստեփանակերտը պատերազմի արդեն երկրորդ օրից՝ սեպտեմբերի 28-ից, թշնամու հրթիռահրետանային հարվածների թիրախում հայտնվեց։ Լուսավոր, մաքուր, գունեղ քաղաքի շատ հատվածներ ավերակների վերածվեցին։ Քաղաքապետ Դավիթ Սարգսյանը դեռ ռազմական գործողությունների օրերին հայտնել էր, որ քաղաքի շինությունների 40 տոկոսը վնասված է։ Երբեմնի բարեկարգ ու մաքրությամբ աչքի ընկնող փողոցներն այժմ անմխիթար վիճակում են, քաղաքը դատարկ է թվում։
Արցախցիները շարունակում են վերադառնալ Ստեփանակերտ` այն կրկին շենացնելու, կյանքով լցնելու, ապրեցնելու ցանկությամբ։ Sputnik Արմենիայի նկարահանող խումբը լուսանկարել է քաղաքն ու բնակիչներին։ Ոմանք զբաղված են քաղաքի մաքրությամբ, ոմանք կրկին վերադարձել են իրենց աշխատանքին՝ հաց են թխում, միս վաճառում, խանութները բացում։ Իսկ բնակելի շենքերի պարաններից կախված լվացքը քաղաք վերադարձող կյանքի ակնառու ապացույցն է։
Նոյեմբեր 16-ի տվյալներով Արցախի մայրաքաղաք էր վերադարձել մոտ 1200 մարդ։
Հիշեցնենք, որ Արցախի դեմ Ադրբեջանի ու Թուրքիայի սանձազերծած պատերազմի հետևանքով ներքին կամ արտաքին տեղահանության է ենթարկվել գրեթե 100 հազար մարդ։
Ըստ վերջին հրապարակված տվյալների, հայկական կողմից զոհվել են 1434 զինծառայողներ։ Քաղաքացիական անձանց շրջանում կա 50 զոհ ու 148 վիրավոր։
Արցախի բնակիչները Երևանից վերադառնում են Ստեփանակերտ. տեսանյութ
