ԵՐԵՎԱՆ, 14 նոյեմբերի - Sputnik. Այժմ Հայաստանում կորոնավիրուսի 39564 ակտիվ դեպք կա, հիվանդներից ընդամենը 2500-ն են բուժվում հիվանդանոցներում, մյուսները տանն են։ Վարչապետի մամուլի ծառայությունը հայտնում է, որ այսօր կառավարությունում կայացած հանդիպման ժամանակ առողջապահության նախարար Արսեն Թորոսյանը վարչապետ Նիկոլ Փաշինյանին զեկուցել է կորոնավիրուսային իրավիճակի և վիրավոր զինծառայողների բուժօգնության կազմակերպման մասին։
Նախարարը նշել է, որ պատերազմի ժամանակ կորոնավիրուսի հետ կապված իրավիճակը շարունակել է մնալ լարված: Ռազմական գործողությունների հետևանքով վիրավորվածների բուժման կողքին առողջապահական համակարգը շարունակել է զբաղվել հազարավոր այն քաղաքացիներով, որոնց մոտ կորոնավիրուս է ախտորոշվել: Նախարարը տեղեկացրել է, որ 26 բժշկական հաստատություններ զբաղվել են կորոնավիրուսային հիվանդությամբ:
«Ծավալների աճ ենք ունեցել և դեռ չունենք հակառակ ծավալման որևէ առիթ, քանի որ թվերը բարձր են մնում»,- ասել է նախարարը:
Նա տեղեկացրել է, որ այժմ հոսպիտալացման իր հերթին 553 կորոնավիրուսով հիվանդ է սպասում: Նրանց վիճակը կամ ծանր է, կամ ծայրահեղ ծանր:
«Բայց վերջին 7-10 օրերի ընթացքում ունեցել ենք նման մինչև 850 քաղաքացի: Փորձում ենք եղած հոսպիտալային մահճակալների հզորությունները և թթվածնային կետերն ավելացնել, որպեսի հերթում գտնվողների թիվը նվազեցենք»,- ասել է նախարար Թորոսյանը:
Նախարարն անդրադարձել է շրջանառվող այն տեղեկություններին, թե կան հիվանդանոցներ, որոնք չեն զբաղվում կորոնավիրուսային հիվանդությամբ։ Թորոսյանն ընդգծել է՝այդպիսի հիվանդանոցներ կան:
«Նրանց մի մասը նպատակային չեն զբաղվում կորոնավիրուսով, որովհետև մեզ համար եղել են ռեզերվային հոսպիտալներ՝ ռազմական գործողությունների ժամանակ այլ ուղղություններով ծավալվելու համար: Այդ նպատակով էլ դրանք նպատակային կերպով դատարկ են թողնվել: Միաժամանակ կան հիվանդանոցներ, որոնց թիվը շատ քիչ է, որոնք չեն զբաղվում կորոնավիրուսով, քանի որ ունեն թթվածնով ապահովման խնդիր: Ինչպես ամռանը, այժմ էլ թթվածինը հիմնական խնդիրն է»,- ասել է նախարարը։
Նա նաև հավելել է՝ թեպետ ձեռք էին բերվել թթվածնային մի քանի կայաններ Եվրոպայից և այլ երկրներից, սակայն չկանխատեսված այսպիսի մեծ թվերը, ինչպես ամբողջ աշխարհում, կրկին թթվածնի պահանջարկը մեծացրել են: Թորոսյանի խոսքով՝ նախկինում թթվածին էինք ներկրում Ռուսաստանի Դաշնությունից, այժմ՝ Վրաստանից: Եվս 4 կայան Չինաստանից է ձեռք բերվել:
Նախարարն անդրադարձել է նաև թթվածինը ձեռք բերելու դժվարություններին՝ ընդգծելով, որ այն քվոտավորված է նույնիսկ երկրի ներսում:
«Մեր մաքսիմումի վրա ենք, դա միանշանակ»,- ասել է նախարարն ու ընդգծել, որ այս մարտահրավերի դեմն առնելու մեր միակ գործիքը թվերի նվազեցումն է։
Հայաստանում կորոնավիրուսով վարակվածների թիվը հասել է 115855–ի։
