ԵՐԵՎԱՆ, 13 նոյեմբերի – Sputnik. ՀՀ կառավարության համար առաջնային խնդիր է, որպեսզի արցախցիներն աջակցություն ստանան Արցախում: Այսինքն, դա պետք է լինի ծրագիր, որը նպաստում արցախցիների՝ Արցախ վերադառնալու գործընթացին։ Կառավարությունում ընդլայնված կազմով խորհրդակցության ժամանակ ասել է ՀՀ վարչապետ Նիկոլ Փաշինյանը։
Վարչապետի մամուլի ծառայությունը հայտնում է, որ Փաշինյանը հանձնարարել է սեղմ ժամկետում Արցախի կառավարության հետ ձևավորել աշխատանքային խումբ, որը կզբաղվի Արցախի ենթակառուցվածքների վերականգնման հարցերով և կառաջարկի խնդիրների լուծման համապատասխան առաջարկություններ:
«Մասնավորապես, պետք է քննարկենք, թե աջակցության ինչ ծրագրեր ենք իրականացնելու նրանց համար: Այս առումով նախ եկեք արձանագրենք, թե այս ընթացքում մենք ինչ ենք արել, ինչով ենք աջակցել նրանց և առաջիկայում ինչպիսի ծրագրեր ենք նախատեսում, ինչպես ենք իրականացնելու այդ ծրագրերը»,- նշել է վարչապետը:
Պատասխանատուները զեկուցել են, որ պատերազմի առաջին օրերին արցախցիների աջակցության աշխատանքները կազմակերպելու գործընթացը իրականացվել է վարչապետի աշխատակազմի անմիջական համակարգմամբ Արցախի գործընկերների հետ սերտ համագործակցությամբ: Ներգրավված են եղել նաև կամավորական խմբեր, որոնք գործել են ինչպես Արցախում, այնպես էլ Հայաստանում: Աշխատանքներն ուղղված են եղել կացարանի, սննդի ապահովմանը, արցախցի երեխաների կրթական, առողջապահական և այլ խնդիրների լուծմանը:
Նշվել է, որ Հայաստան տեղափոխվածների մի մասն այս օրերին տեղավորվել է ինչպես առանձին անհատների բնակարաններում, պետական սեփականություն հանդիսացող տարբեր հաստատություններում, այնպես էլ հյուրանոցներում, հյուրատներում: Կառավարությունը նախատեսում է առաջիկայում իրականացնել վերջիններիս կոմունալ վճարների աջակցության միջոցառում:
Իրենց տունը կորցրած արցախցիները հիմնականում կբնակեցվեն Ստեփանակերտում. Արցախի նախագահ
