ԵՐԵՎԱՆ, 11 նոյեմբերի – Sputnik. Բողոքի ակցիաների կազմակերպիչ ընդդիմության առաջնորդների մի մասն այս պահին դեռ շարունակում է մնալ ԱԱԾ-ում, մի մասն էլ դեռ նոր է հրավիրվել իրավապահ մարմիններ:
ԱԱԾ հրավիրվածների թվում են ՀՀԿ գործադիր մարմնի անդամ Էդուարդ Շարմազանովը, «Հայրենիք» կուսակցության առաջնորդ Արթուր Վանեցյանը, ԲՀԿ առաջնորդ Գագիկ Ծառուկյանը, ՀՅԴ ԳՄ ներկայացուցիչ Իշխան Սաղաթելյանն ու ՀՅԴ ԳՄ անդամ Գեղամ Մանուկյանը, «Մեկ Հայաստան» կուսակցության ղեկավար Արթուր Ղազինյանը:
Գեղամ Մանուկյանի ԱԱԾ տարվելու լուրը հաստատել է նրա փաստաբան Գարիկ Սահակյանը՝ հավելելով, որ գործի հետ կապված որևէ տեղեկություն չունի: Մինչ այդ Մանուկյանին ոստիկանները բողոքի ակցիայի տարածքից բերման էին ենթարկել Ոստիկանության Երևան քաղաքի գլխավոր վարչություն:
Մինչ այժմ ԱԱԾ-ում է նաև կամավոր այնտեղ ներկայացած ԱԱԾ նախկին տնօրեն Արթուր Վանեցյանը: Նա այնտեղ հավաքված լրագրողներին հայտնել էր, որ ԱԱԾ են հրավիրել ռազմական դրության ժամանակ արգելված տեղեկություն հայտնելու համար։
Գագիկ Ծառուկյանն այս պահին ևս ամենայն հավանականությամբ դեռ շարունակում է մնալ ԱԱԾ շենքում: Նա այստեղ էր եկել դեռ կեսօրին: Ծառուկյանի գտնվելու վայրը ճշտելու մեր փորձերը որևէ օգուտ չտվեցին: Նրա խոսնակ, ԱԺ պատգամավոր Իվետա Տոնոյանը մեր հեռախոսազանգերն անպատասխան թողեց: Իսկ փաստաբաններից միակը, որ վերցրեց հեռախոսը՝ Էմիլ Խաչատրյանը, հայտնեց, որ որևէ բան չի մեկնաբանում ու ժամանակ չունի անգամ մեր միակ հարցին պատասխանելու:
Այս պահին ԱԱԾ-ում է նաև ՀՅԴ ԳՄ ներկայացուցիչ Իշխան Սաղաթելյանը: Մյուս հրավիրվածների մասին առայժմ տեղեկություններ չկան՝ ներկայացել են, թե ոչ:
Քիչ առաջ ԱԱԾ ժամանեց նաև «Մեկ Հայաստան» կուսակցության ղեկավար Արթուր Ղազինյանը: Մինչ շենք մտնելը նա մուտքի մոտ հավաքված լրագրողներին հայտնեց, որ ԱԱԾ է հրավիրվել հեռախոսազանգով: «Չգիտեմ` ինչ նպատակով, չգիտեմ ինչի համար, ինչ կարգավիճակով»,- ասաց նա:
«Նիկոլ, դավաճան». հազարավոր ցուցարարներ պահանջում են Փաշինյանի հրաժարականը. տեսանյութ
Ղազինյանը կարծիք հայտնեց, որ իր հրավերը կապված է քաղաքական ընդդիմադիր գործունեության հետ, քանի որ իր, համոզմամբ, ԱԱԾ հրավիրվելու այլ առիթ չունի:
Նշենք նաև, որ ընդդիմադիր ԲՀԿ-ի անդամ պատգամավորներն այս պահին գտնվում են ԱԺ-ում՝ սպասելով ԱԺ խորհրդի նիստի անդամների հավաքվելուն: Նրանց հետ ԱԺ-ում են նաև «Լուսավոր Հայաստանի» պատգամավորները: Ինչպես հայտարարել էր ԼՀԿ նախագահ Էդմոն Մարուքյանը, ԱԺ արտահերթ նիստ հրավիրելու համար ԱԺ խորհրդի որոշման համար իրենց պակասում է խորհրդի 4 անդամների ձայն:
Փաստաթղթում վտանգավոր ձևակերպումներ կան. Արա Զոհրաբյանը` Նիկոլ Փաշինյանի հրաժարականի մասին
Հիշեցնենք՝ ՀՀ ընդդիմադիր 17 կուսակցությունների նախաձեռնած հանրահավաքից առաջ ու հանրահավաքի ընթացքում ընդդիմության առաջնորդները բերման ենթարկվեցին ոստիկանություն ու ԱԱԾ, նաև ծանուցումներ ստացած ԱԱԾ ներկայանալու:
Երեկոյան` ժամը 20:30-ի սահմանում, հանրահավաքի կազմակերպիչները մասնակիցներին կոչ արեցին գնալ տուն՝ խոստանալով հետագա անելիքների մասին հայտնել կեսգիշերն անց՝ 00:30-ին կայանալիք ասուլիսում:
