ԵՐԵՎԱՆ, 11 նոյեմբերի – Sputnik. ՀԱՊԿ գլխավոր քարտուղար Ստանիսլավ Զասն այսօր լրագրողներին ասել է, որ ռուս խաղաղապահների մուտքը Ղարաբաղ էական գործոն կդառնա։
«Կարծում ենք, որ ռուս խաղաղապահների տեղակայումը ուժի չկիրառման էական զսպող գործոն է։ Կրկին հիշեցնում ենք, որ Լեռնային Ղարաբաղի հակամարտության լուծումը հնարավոր է միայն քաղաքական-դիվանագիտական մեթոդներով»,– նշել է նա։
Զասի խոսքով՝ Հավաքական անվտանգության պայմանագրի կազմակերպությունը ողջունում է Ղարաբաղյան հակամարտության գոտում ռազմական գործողությունների դադարեցումը։
«Մենք դրական ենք գնահատում Լեռնային Ղարաբաղի հակամարտության գոտում ռազմական գործողությունների դադարեցման փաստը։ Դա հնարավոր դարձավ նոյեմբերի 9-ին Ռուսաստանի, Ադրբեջանի նախագահների և Հայաստանի վարչապետի կողմից համապատասխան հայտարարություն ստորագրելուց հետո։ Ողջունում ենք բոլոր այն գործողությունները, որոնք տանում են տարածաշրջանում խաղաղության հաստատմանն ու արյունահեղության դադարեցմանը: ՀԱՊԿ-ը հակամարտող կողմերին բազմաթիվ անգամ է կոչ արել վերադառնալ հրադադարի ռեժիմին և Լեռնային Ղարաբաղի հակամարտությունը կարգավորել բացառապես խաղաղ բանակցությունների միջոցով», - ասել է նա։
Հիշեցնենք` Արցախում ու արցախա-ադրբեջանական շփման գծում ռուս խաղաղապահներ տեղակայելու վերաբերյալ կետն ընդգրկված էր նոյեմբերի 9-ին ՌԴ նախագահ Վլադիմիր Պուտինի, ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի՝ ռազմական գործողությունների դադարեցման վերաբերյալ համատեղ հայտարարության մեջ։
Լեռնային Ղարաբաղի շփման գծում և Լաչինի միջանցքի երկայնքով, որը կապահովի տարածաշրջանի կապը Հայաստանի հետ, կարգուկանոն պահպանելու համար Ռուսաստանը մոտ 2 հազար զինծառայող է ուղարկում: Նրանք ապահովված կլինեն հրաձգային զենքով, 90 զրահամեքենայով, 380 միավոր ավտոմոբիլային և հատուկ տեխնիկայով։
ՌԴ զինված ուժերի գլխավոր շտաբի գլխավոր օպերատիվ վարչության պետ Սերգեյ Ռուդսկոյն ավելի վաղ հայտնել էր, որ Ռուսաստանի խաղաղապահ զորակազմը, որն ուղարկվել է Լեռնային Ղարաբաղի հակամարտության գոտի, հագեցած է ամենաժամանակակից սպառազինությամբ և հատուկ տեխնիկայով։
Արցախում ռուս դիտորդների առաջադրանքներն են (ըստ ՌԴ գլխավոր շտաբի հաղորդման)` հրադադարի խախտումների մասին տեղեկատվության հավաքագրում և այդ տվյալները խաղաղապահների հրամանատարության տրամադրում, տարանցիկ տրանսպորտի երթևեկության անվտանգության ապահովում, խաղաղ բնակչության դեմ հակաիրավական գործողությունների կասեցում։
