ԵՐԵՎԱՆ, 11 նոյեմբերի - Sputnik. Ռուսաստանի խաղաղապահ կոնտինգենտը, որն ուղարկվել է Լեռնային Ղարաբաղի հակամարտության գոտի, հագեցած է ամենաժամանակակից սպառազինությամբ և հատուկ տեխնիկայով, հայտնել Է ՌԴ Զինված ուժերի գլխավոր շտաբի գլխավոր օպերատիվ վարչության պետ Սերգեյ Ռուդսկոյը:
Այդ թվում՝ БТР-82А զրահափոխադրիչներով, «Тигр» և «Тайфун» զրահամեքենաներով, ինչպես նաև ապահովված են զինամթերքի, պարենամթերքի և այլնի բոլոր անհրաժեշտ տեսակներով։
«Գործնականում բոլոր զինծառայողները հումանիտար գործողությունների ապահովման եւ պահպանման խնդիրների կատարման փորձ ունեն Սիրիայի Արաբական Հանրապետությունում»,-ընդգծել է Ռուդսկոյը։
Նրա խոսքով՝ «Անձնակազմը զինված հակամարտություններում միջազգային հումանիտար իրավունքի նորմերի ուսումնասիրման և պահպանման հատուկ պատրաստություն Է անցել»։
Ներկայումս երկու կողմերն էլ դադարեցրել են մարտական գործողությունները։ Ադրբեջանի և Հայաստանի զինված ուժերի ստորաբաժանումները կանգ են առել զբաղեցրած սահմաններին, ասել է Ռուդսկոյը։
Արցախում ռուս դիտորդների առաջադրանքներն են (ըստ ՌԴ գլխավոր շտաբի հաղորդման)` հրադադարի խախտումների մասին տեղեկատվության հավաքագրում և այդ տվյալները խաղաղապահների հրամանատարության տրամադրում, տարանցիկ տրանսպորտի երթևեկության անվտանգության ապահովում, խաղաղ բնակչության դեմ հակաիրավական գործողությունների կասեցում։
Լեռնային Ղարաբաղի շփման գծում և Լաչինի միջանցքի երկայնքով, որը կապահովի տարածաշրջանի կապը Հայաստանի հետ, կարգուկանոն պահպանելու համար Ռուսաստանը մոտ 2 հազար զինծառայող է ուղարկում: Նրանք ապահովված կլինեն հրաձգային զենքով, 90 զրահամեքենայով, 380 միավոր ավտոմոբիլային և հատուկ տեխնիկայով։
Արցախում ու արցախա-ադրբեջանական շփման գծում ռուս խաղաղապահներ տեղակայելու վերաբերյալ կետն ընդգրկված էր նոյեմբերի 9-ին ՌԴ նախագահ Վլադիմիր Պուտինի, ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի՝ ռազմական գործողությունների դադարեցման վերաբերյալ համատեղ հայտարարության մեջ։
