ԵՐԵՎԱՆ, 10 նոյեմբերի -Sputnik. Սոչիում Ռուսաստանի նախագահ Վլադիմիր Պուտինի ղեկավարությամբ կայացած պաշտպանական խորհրդակցության մասնակիցները մեկ րոպե լռությամբ հարգել են երեկ Հայաստանի երկնքում խոցված Մի-24 ուղղաթիռի անձնակազմի հիշատակը:
Պուտինը ՌԴ պաշտպանության նախարար Սերգեյ Շոյգուին հանձնարարել է օգնություն ցուցաբերել ռուսական ուղղաթիռի անձնակազմի զոհված անդամների ընտանիքներին:
Նախագահը նաև նշել է անձնակազմի զոհված անդամների անունները. նրանք են` անձնակազմի հրամանատար Յուրի Իշուկն ու ավագ լեյտենանտ Ռոման Ֆեդինը։
Հիշեցնենք` նոյեմբերի 9–ին ՀՀ տարածքում ռուսական ինքնաթիռ էր խոցվել։ Խոցված Մի-4-ը ուղեկցելիս է եղել Հայաստանում տեղակայված ռուսական 102-րդ ռազմաբազայի ավտոշարասյանը: Sputnik Արմենիայի աղբյուրները հայտնում են, որ ավտոշարասյունը շարժվում էր Սյունիքում ռուս սահմանապահների դիրքերի ամրապնդման համար:
Ռուսաստանի պաշտպանության նախարարությունը հաստատել է, որ նոյեմբերի 9–ին ռուսական Մի-24 ուղղաթիռը կործանվել է Հայաստանում՝ Երասխ բնակավայրի մոտակայքում, ուղղաթիռը խոցվել է երկրից՝ շարժական զենիթահրթիռային համալիրից։ Ուղղաթիռի կործանման արդյունքում զոհվել է անձնակազմի երկու անդամ, ևս մեկը՝ միջին ծանրության վնասվածքներով, տարհանվել է։ Ինչպես հայտարարել է Ռուսաստանի պաշտպանության նախարարության պաշտոնական ներկայացուցիչ, գեներալ-մայոր Իգոր Կոնաշենկովը, ռուսական գրոհիչը խոցվել է մարտական գործողությունների գոտուց դուրս:
Պաշտոնական Բաքուն խոստովանել է, որ Հայաստանի տարածքում ռուսական ուղղաթիռ է խոցել, ներողություն է խնդրել և համապատասխան փոխհատուցում վճարելու պատրաստակամություն է հայտնել։
