ԵՐԵՎԱՆ, 9 նոյեմբերի – Sputnik. Թուրքիայի նախագահ Ռեջեփ Թայիփ Էրդողանն իր ռուս գործընկեր Վլադիմիր Պուտինի հետ հեռախոսային բանակցությունների ընթացքում առաջարկել է ղարաբաղյան խնդրի լուծման աշխատանքային խումբ ստեղծել։ Տեղեկությունը հայտնում է ՌԻԱ Նովոստին՝ հղում անելով CNN Turk-ին։
Ռուսաստանի ու Թուրքիայի նախագահները շաբաթը օրը հեռախոսազրույցի ընթացքում քննարկել են Ղարաբաղի հարցը։ Կրեմլի մամուլի ծառայությունը տեղեկացնում է, որ կողմերը հաստատել են տարածաշրջանում հակամարտության խաղաղ կարգավորման հարցում համատեղ պատրաստակամությունը։
CNN Turk-ը պնդում է, որ Պուտինը ողջունել է թուրք առաջնորդի առաջարկը, և արդեն առաջիկա օրերին ղարաբաղյան ճգնաժամի վերաբերյալ բանակցությունները կարող են անցկացվել երկկողմանի ձևաչափով, ինչը կգործի ԵԱՀԿ Մինսկի խմբի աշխատանքից զատ։
Նշվում է, որ նոր խումբը կսկսի աշխատել հրադադարի հաստատման քայլերի ուղղությումբ, որին կհաջորդեն քաղաքական հանգուցալուծման գործընթացները։
Հիշեցնենք` Հայաստանի և Ադրբեջանի արտգործնախարարներ Զոհրաբ Մնացականյանն ու Ջեյհուն Բայրամովը հոկտեմբերի 9–ին Մոսկվա էին մեկնել` խորհրդատվություններ անցկացնելու։ ՌԴ արտգործնախարար Սերգեյ Լավրովի հետ համատեղ հանդիպումը տևեց գրեթե 11 ժամ և ավարտվեց համաձայնագրի ընդունմամբ, որը հակամարտության կարգավորման չորս կետ է պարունակում։
Մասնավորապես, կողմերը պայմանավորվեցին, որ հոկտեմբերի 10-ին, ժամը 12։00-ից սկսած հումանիտար նպատակներով հրադադար կհաստատվի ռազմագերիներին, այլ պահվող անձանց և զոհվածների մարմինները փոխանակելու համար՝ Միջազգային Կարմիր խաչի չափանիշներին համապատասխան։ Հրադադարի վերաբերյալ պայմանավորվածությունից հետո Ադրբեջանը շարունակեց հրետակոծել Արցախը։
Հոկտեմբերի 17-ին ՀՀ արտգործնախարարությունը հայտնեց, որ Հայաստանի Հանրապետությունը և Ադրբեջանի Հանրապետությունը երկրորդ պայմանավորվածությունն են ձեռք բերել. որոշվել է հոկտեմբերի 18-ին, տեղական ժամանակով ժամը 00:00-ից հաստատել մարդասիրական զինադադար։
Արցախի ՊԲ–ն, սակայն, հոկտեմբերի 18-ի առավոտյան տեղեկացրեց, որ 07:20-ի սահմաններում հրետանային ակտիվ կրակից հետո ադրբեջանական զինուժը հարավային ուղղությամբ անցել է հարձակման: Երկուստեք եղել են զոհեր ու վիրավորներ:
Հոկտեմբերի 26-ին ՀՀ ԱԳՆ–ն հայտարարեց, որ Հայաստանի և Ադրբեջանի արտգործնախարարները հումանիտար հրադադարի հաստատման երրորդ ժամկետի մասին են պայմանավորվել, որը պետք է ուժի մեջ մտներ 2020թ. հոկտեմբերի 26-ին, տեղական ժամանակով 08:00-ին։ Սակայն Ադրբեջանը խախտեց նաև երրորդ պայմանավորվածությունը։
