ԵՐԵՎԱՆ, 8 նոյեմբերի - Sputnik. ՀՀ նախագահ Արմեն Սարգսյանը Բրյուսելում ՆԱՏՕ-ի գլխավոր քարտուղարի Յենս Ստոլտենբերգի հետ հանդիպման ժամանակ բավականին սուր հարցադրումներ է արել Ղարաբաղյան հակամարտությանը Թուրքիայի մասնակցության և դիրքորոշման վերաբերյալ։ «Ուկրաինա 24»-ի հետ զրույցում նախագահը նշել է, որ, ցավոք, չի կարող հրապարակել, թե ինչպես է գլխավոր քարտուղարը մեկնաբանել այդ ամենը, քանի որ քննարկումները փակ են անցկացվել, հաղորդում է ՀՀ նախագահի մամուլի ծառայությունը։
Նա ընդգծել է, որ որպես ՆԱՏՕ-ում Հայաստանի առաջին դեսպան` իր համար անհասկանալի է, թե ինչպես կարող է ՆԱՏՕ-ի անդամ երկիրն օգտագործել ՆԱՏՕ-ի զենքը:
«Ղարաբաղում թուրքական կողմից օգտագործվող կամ Ադրբեջանին տված զենքը ՆԱՏՕ-ինն է: Նույն Bayraktar ԱԹՍ-ները չնայած թուրքական են, դրանց շարժիչը ավստրիական է, ավիացիոն համակարգը Կանադայից է, արկերի կառավարման համակարգը՝ Մեծ Բրիտանիայից: Դա ՆԱՏՕ-ի զենքն է: Այդ զենքերը, սպաները, որոնք վարժանքներ են անցել ՆԱՏՕ-ում, պատերազմի մարտավարությունը ՆԱՏՕ-ից է, և այդ ամենը կիրառվում է Լեռնային Ղարաբաղի դեմ: Որտեղ է Լեռնային Ղարաբաղը և որտեղ՝ ՆԱՏՕ-ն»,- ասել է ՀՀ նախագահը:
Նախագահի գնահատմամբ՝ ինքը բանակցություններով բավարարված է։ Շեշտում է՝ հարցերը դրված էին շատ կոնկրետ, և ստացել է պատասխաններ, որոնք քիչ թե շատ` գիտեր։
«Սակայն այդ խոսակցությունը պետք է կայանար: Սակայն ՆԱՏՕ-ի վրա ճնշումները պետք է շարունակվեն»,- հավելել է նա։
Նախագահը մանրամասնել է՝ եթե ՆԱՏՕ-ն ճնշում չգործադրի Թուրքիայի վրա, ապա որպես կազմակերպություն` չի կարող շարունակել ղեկավարել իր անդամներից մեկին, և նրա ակտիվությունը չի ավարտվի Ղարաբաղով:
«Թուրքիան խոսում է իր էթնիկ եղբայրների մասին, տեսեք, թե մինչև ուր են նրանք հասնում: Նրանք հասնում են մինչև Կենտրոնական Ասիա, Չինաստան, Մոնղոլիա, Ռուսաստան, Ուկրաինա: Ամեն անգամ Թուրքիան պետք է ռազմական տեխնոլոգիաներ և սարքավորումնե՞ր օգտագործի, որպեսզի օգնի իր քույրերին և եղբայրներին: Դա միջնադարյան մոտեցում է»,- ընդգծել է նախագահը։
Ադրբեջանի նոր կորուստները. 150 զոհ և 35 զրահատեխնիկա` մեկ օրում
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Նոյեմբերի 6-ի ժամը 19։00-ի դրությամբ` հակառակորդի կրակոցների հետևանքով հայկական կողմից զոհվել են 1177 զինծառայողներ։ Քաղաքացիական անձանց շրջանում կա 50 զոհ ու 148 վիրավոր։
Ըստ վերջին տվյալների՝ Ադրբեջանի զինված ուժերը զրկվել է 262 ԱԹՍ-ից, 16 ուղղաթիռից, 25 ինքնաթիռից, 749 զրահատեխնիկայից, 6 ՏՕՍ-ից, 7510 կենդանի ուժից։
Ձախողված բլիցկրիգը, կամ Բաքվի ծրագրով վարձկանների մասին աշխարհը չպիտի իմանար
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
Արցախի նկատմամբ կիրառված ֆոսֆորը դիմավորեք Ադրբեջանում, Իրանում ու Թուրքիայում
