ԵՐԵՎԱՆ, 7 նոյեմբերի - Sputnik. Այն աջակցութունը, որը Հայաստանն ակնկալում է Ռուսաստանից, ստանում է և չկա որևէ վերապահում Հայաստանի նկատմամբ Ռուսաստանի անվտանգային և դաշնակցային պարտավորությունների կատարման որակի վերաբերյալ: Այս մասին ՀՀ վարչապետ Նիկոլ Փաշինյանն ասել է գերմանական ARD հեռուստաալիքին տված հարցազրույցի ժամանակ։
Վարչապետը նշել է, որ մյուս կողմից, Հայաստանում հասկանում են, որ Ռուսաստանը նախ ԵԱՀԿ Մինսկի խմբի համանախագահ երկիր է, որն ունի որոշակի չեզոքության պարտավորություն Լեռնային Ղարաբաղի հարցում։ Եվ որը նաև լավ հարաբերություններ ունի Ադրբեջանի հետ:
«Սա, իհարկե, այքան էլ պարզ իրավիճակ չէ, բայց մենք գոհ ենք Հայաստանի նկատմամբ Ռուսաստանի ունեցած պարտավորությունների կատարման որակից»,-ասել է Փաշինյանը:
Անդրադառնալով Լեռնային Ղարաբաղում ռուսական խաղաղապահների տեղակայման հարցին, վարչապետը նշել է, որ դա այժմ կարևոր հարցերից մեկն է։
ՌԴ փոխարտգործնախարարը մեկնաբանել է սկանդինավյան խաղաղապահներին Ղարաբաղ տանելու գաղափարը
«Ես ասել եմ, որ մեզ համար ընդունելի է ռուսական խաղաղապահների տեղակայումը։ Եվ այստեղ հարցը ոչ այնքան և ոչ միայն քաղաքական է, այլև պրակտիկ, որովհետև նախ Ռուսաստանը ներկա է տարածաշրջանում: Այսինքն՝ խաղաղապահներ ենթադրում է օպերատիվ արձագանք, և Ռուսաստանը ներկա է տարածաշրջանում, Ռուսաստանը գիտի տարածաշրջանը»,-ընդգծել է Փաշինյանը։
Վարչապետի խոսքով՝ ռուսական խաղաղապահների գործունեությունը կարող է միայն ամենարդյունավետը լինել։
«Պետք է այնպես անենք, որ խաղաղապահներն իրոք կայունություն և ոչ թե անկայունություն, անհանգստություններ առաջ բերեն: Կարծում եմ՝ ռուսական խաղաղապահներն ամենահարմար և ճիշտ դերակատարներն են այս պրոցեսի ընթացքում»,-ընդգծել է վարչապետը:
Լրագրողի հարցին, թե արդյոք ԵՄ-ն պե՞տք է խաղաղապահներ ուղարկի, Փաշինյանն պատասխանել է, որ բազմիցս արտահայտել է իր կարծիքը և նշել, որ Եվրամիությունը կարող է աջակցել պրոցեսին՝ հստակ արձանագրելով, թե ով է եղել այս պատերազմի նախաձեռնողը, հստակ արձանագրելով տարածաշրջան վարձկանների տեղափոխման փաստը:
«Ադրբեջանը, հակառակը, առաջարկում է տեղակայել թուրք խաղաղապահներ» լրագրողի դիտարկմանը Փաշինյանն ի պատասխան կրկնել է, որ Թուրքիան տարածաշրջան ահաբեկիչներ և վարձկաններ բերող երկիր է, ու դժվար է պատկերացնել այս դերակատարումն ունեցող երկրի որևէ խաղաղ, առավել ևս՝ խաղաղարար կամ խաղաղապահ գործընթացը:
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Թուրք խաղաղապահներն անընդունելի են ինչպես ՀՀ–ի, այնպես էլ ԱՄՆ-ի համար. Թրամփի խորհրդական
Նոյեմբերի 6-ի ժամը 19։00-ի դրությամբ` հակառակորդի կրակոցների հետևանքով հայկական կողմից զոհվել են 1177 զինծառայողներ։ Քաղաքացիական անձանց շրջանում կա 50 զոհ ու 148 վիրավոր։
Ըստ վերջին տվյալների՝ Ադրբեջանի զինված ուժերը զրկվել է 262 ԱԹՍ-ից, 16 ուղղաթիռից, 25 ինքնաթիռից, 749 զրահատեխնիկայից, 6 ՏՕՍ-ից, 7510 կենդանի ուժից։
Ձախողված բլիցկրիգը, կամ Բաքվի ծրագրով վարձկանների մասին աշխարհը չպիտի իմանար
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
