ԵՐԵՎԱՆ, 6 նոյեմբերի - Sputnik. Արցախի Մարդու իրավունքների պաշտպան Արտակ Բեգլարյանը նոր տեսանյութ է հրապարակել, որում անձամբ է պատմում ադրբեջանական հերթական հրթիռակոծության հետևանքների մասին։ Տեսանյութում Բեգլարյանի հագին զրահաբաճկոն է, մեջքի հետևում՝ ամբողջովին ավերված շինություն։ Բացատրում է՝ ինքը Ստեփանակերտի բնակելի թաղամասերից մեկում է, իսկ թիկունքում լրիվ ավերակի վերածված տուն է։
«Սա ադրբեջանական այսօրվա հրթիռակոծության հետևանքն էր. երեք խաղաղ բնակիչ է սպանվել։Նրանցից մեկը 70-ամյա կինն էր, մյուս երկուսը նրա թոռներն էին։ Ադրբեջանը շարունակում է պատերազմական հանցագործություններն ու Արցախի խաղաղ բնակչության թիրախավորումը ոչ միայն մայրաքաղաք Ստեփանակերտում, այլև մյուս բնակավայրերում»,- նշում է Բեգլարյանը։
Նրա խոսքով՝ ադրբեջանական հրթիռահերտանային թիրախավորված հարվածների հետևանքով արդեն շուրջ 50 սպանված խաղաղ բնակիչ կա, 150-ից ավելին վիրավոր են, 17 հազարից ավելի քաղաքացիական շինություններ և ենթակառուցվածքներ լրջորեն վնասված են, ավերված են։
Նա նշում է՝ Ադրբեջանն այլ պատերազմական հանցագործություններ էլ է շարունակում, սակայն միջազգային հանրությունը շարունակում է կույր լինել այն ամենի հանդեպ, ինչ տեղի է ունենում Արցախում։
Արցախի Մարդու իրավունքների պաշտպանը հերթական անգամ դիմում է միջազգային հանրությանը՝ կոչ անելով դադարեցնել կույր լինելը Արցախում տեղի ունեցող հանցագործությունների հանդեպ, օգնել Արցախի ժողովրդին և կոնկրետ քայլեր ձեռնարկել այդ ուղղությամբ։
Ի դեպ, տեսանյութի ընթացքում պարբերաբար պայթյունների, կրակոցների ձայներ են լսվում։
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Նոյեմբերի 6-ի ժամը 19։00-ի դրությամբ` հակառակորդի կրակոցների հետևանքով հայկական կողմից զոհվել են 1177 զինծառայողներ։ Քաղաքացիական անձանց շրջանում կա 50 զոհ ու 148 վիրավոր։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 7405 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 257 անօդաչու թռչող սարք, 16 ուղղաթիռ, 25 ինքնաթիռ, 736 զրահատեխնիկա, 6 ՏՈՍ համակարգ։
Ձախողված բլիցկրիգը, կամ Բաքվի ծրագրով վարձկանների մասին աշխարհը չպիտի իմանար
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
Արցախի նկատմամբ կիրառված ֆոսֆորը դիմավորեք Ադրբեջանում, Իրանում ու Թուրքիայում
