ԵՐԵՎԱՆ, 6 նոյեմբերի — Sputnik. Արցախից Հայաստան տեղափոխված ընտանիքներից շատերն են սննդի և հագուստի կարիք զգում և, չիմանալով ինչ անել, ուր դիմել` սոցցանցերում են գրառում կատարում, հայտնում կարիքների մասին։ Հաճախ հարցը չի էլ հասնում պատկան մարմիններին դիմելուն, քանի որ քաղաքացիներն ինքնակազմակերպվում և օգնում են արցախցիներին։ Սակայն պարզ է, որ արցախցիները Հայաստան են եկել առանց ոչնչի. նրանց մի մասը փորձում է ինչ–որ բան թխելով, ձեռքի աշխատանքներ վաճառելով` հոգալ կարիքները, բայց մեծամասնությունն աշխատանք չունի այստեղ։
Sputnik Արմենիան տարբեր գերատեսչություններից և պատկան մարմիններից փորձել է ճշտել` ով կամ ինչպես են լուծում արցախցիների սննդի և հագուստի խնդիրները։
Սննդով և հիգիենայի պարագաներով ապահովելու հարցով զբաղվում են տեղական ինքնակառավարման մարմինները՝ պետական միջոցների հաշվին: Այսինքն` մարզպետարաններին տրամադրվում է որոշակի բյուջե, ինչպես նաև ԱԻՆ–ն է փոխանցում հումանիտար օգնությամբ իրենց բաժին հասած փաթեթներ։
Արտակարգ իրավիճակների նախարարության լրատվական վարչությունից տեղեկացրին, որ ԱԻՆ-ը ստացված օգնությունը (սնունդ, առաջին անհրաժեշտության ապրանքներ և այլն) տեսակավորելուց և խմբավորելուց հետո, դրանք փոխանցում է համայնքապետարաններին և մարզպետարաններին։ Միաժամանակ, Հայաստանի տարբեր անկյուններից հումանիտար բեռների հոսքը շարունակվում է, ավելացել է արտերկրից ուղարկվող բեռների ծավալը։
Երևանի քաղաքապետարանի տեղեկատվության և հասարակայնության հետ կապերի վարչության պետ Հովսեփ Կուբատյանն էլ հայտնեց, որ վարչական շրջաններում առանձնացվել են պահեստներ՝ Արցախին աջակցելու նպատակով։ Պահեստում առկա ապրանքներից կազմվում են շուրջ 2 շաբաթվա մթերքի և այլ անհրաժեշտ իրերի փաթեթներ:
«Քաղաքապետարանը վարչական շրջաններում պահեստավորում է ՀԿ–ների, մարդկանց տրամադրած չոր սնունդն ու հագուստը։ Փաթեթներ կազմելուց հետո դրանք կամ ուղարկում ենք ԱԻՆ, որ Արցախ ուղարկեն, կամ էլ` այն ընտանիքներին ու հյուրանոցներին, որտեղ սննդի կարիք կա։ Բացի այդ, յուրաքանչյուր վարչական շրջան սննդի ու հագուստի բազա ունի` հիմա ավելի քիչ, քան` սկզբում էր»,–ասաց Կուբաթյանը։
ՀՀ–ում քննարկվում է հյուրատների և հյուրանոցների կոմունալ ծախսերի փոխհատուցման հարցը
Նա հայտնեց` վերջին շրջանում Արցախից եկածների քանակն ավելացել է, սակայն փորձում են անել ամեն ինչ, որպեսզի սննդի կարիք ունեցողիներն, երբ դիմում են որևէ վարչական շրջան, տրամադրեն փաթեթներ։ Կուբաթյանն ասաց նաև, որ հնարավոր է լինեն դեպքեր, երբ մարդը դիմի որևէ վարչական շրջան, սակայն այդ պահին պահեստավորված սնունդ չլինի։ Այդ դեպքում աշխատանքի և սոցիալական հարցերի նախարարության կամ ՀԿ–ների հետ են կապ հաստատում ու բնակչին ուղղորդում որևէ այլ կառույց։ Իսկ ինչ վերաբերում է հագուստին, ապա դա կուտակվում է կամավորության սկզբունքով` բնակիչներն իրենք են վարչական շրջաններ տանում հագուստ, իսկ արցախցիները դրանց միջից ընտրում են իրենց ինչ անհրաժեշտ է։ Նշենք, որ կրկնակի աջակցության տրամադրումը կախված է պահեստներում առկա սննդից:
Արարատի մարզպետարանից հայտնեցին, որ նախ կատարվում է մարզ այցելածների կարիքների գնահատում, որից հետո համայնքներում ժամանակավորապես ապաստանած արցախցիներին աջակցություն է ցուցաբերվում։ Արցախցիները հիմնականում ունենում են սննդի, տաք հագուստի, հիգիենիկ պարագաների կարիք։ «Ամեն ինչ արվում է, որ մարզում գտնվող արցախցի մեր հայրենակիցները որևէ բանի կարիք չունենան։ Պետք է ուրախությամբ նշենք, որ բավականին ակտիվ է հասարակությունը` մարդիկ շտապում են ցանկացած հարցով աջակցել Արցախից ժամանածներին»,–հայտնեցին մարզպետարանից։
Կոտայքի մարզպետարանի լրատվության բաժնից տեղեկացրին` իրենց մարզում ևս այս պահին կան Արցախից ժամանակավորապես տեղափոխված քաղաքացիներ:
«Պետբյուջեի հաշվին Կոտայքի մարզպետարանը գնումներ է սկսել՝ սնունդ և հիգիենիկ պարագաներ ձեռք բերելու նպատակով: Դրանք ձեռք բերելուց հետո փոխանցում են համայնքներին, որպեսզի բաժանվեն արցախցիներին»,– ասացին մարզպետարանից։
Ժամանակավորապես ՀՀ տեղափոխված արցախցիների համար Երևանում օպերատիվ շտաբ է գործում
Ի դեպ, այս նույն սկզբունքով են աշխատում բոլոր մարզերում։
Վերջին տվյալներով` Հայաստան են եկել 90 000 արցախցիներ։
