ԵՐԵՎԱՆ, 5 նոյեմբերի — Sputnik. Ահաբեկչության դեմ պայքարն այսօր դարձել է Հայաստանի թիվ մեկ քաղաքական խնդիրներից մեկը։ Այսօր ՀՀ ԱԺ արտաքին հարաբերությունների ու ֆինանսավարկային և բյուջետային հարցերի մշտական հանձնաժողովների նիստում 2021թ–ի պետական բյուջեի նախագծի քննարկման ժամանակ այս մասին ասաց ԱԳ նախարար Զոհրաբ Մնացականյանը։
«Մեր հայրենակիցներն Արցախում ու հայ ժողովուրդը փաստացի պայքարում է 3 թշնամիների դեմ`Թուրքիայի, միջազգային ահաբեկիչ զինյալների և Ադրբեջանի։ Եվ ահաբեկիչ զինյալների հայտնվելը մեր տարածաշրջանում առավել քան մարտահրավեր է շատ ավելի լայն կոնտեքստում, քան միայն մեզ համար։ Դրա հետևանքներն իրապես լրջագույն են։ Ես չգիտեմ` ինչով էին մտածում Բաքվում, երբ ներքաշում էին զինյալներին այս պատերազմի մեջ»,– ասաց Մնացականյանը։
Ահաբեկիչների առկայությունը տարածաշրջանում, նրա դիտարկմամբ, վտանգ է ամբողջ տարածաշրջանի ու անգամ դրա սահմաններից դուրս։ ԱԳ նախարարը նշեց, որ այս հարցով Հայսաստանն ակտիվ երկխոսությունների մեջ է թե՛ տարածաշրջանի, ու թե՛ ավելի հեռավոր երկրների հետ։
ԱԺ «Իմ քայլը» խմբակցության պատգամավոր Արտակ Մանուկյանը հետաքրքրվեց` արդյո՞ք Հայաստանը չպիտի հետևի Ֆրանսիայի օրինակին ու արգելի իր տարածքում թուրքական ծայրահեղական «Գորշ գայլեր» խմբավորման ու այլ ահաբեկչական խմբավորումների գործունեությունը, Զոհրաբ Մնացականյանը պատասխանեց, որ այդ որոշումն այժմ կախված է Հայաստանի դիվանագիտական երկխոսությունների արդյունքներից ու խոստացավ այդ հարցին ավելի հանգամանալից պատասխանել ավելի ուշ։
Արցախի դեմ սանձազերծած պատերազմի առաջին իսկ օրերից հայտնի դարձավ, որ Թուրքիան Սիրիայի հյուսիսից վարձկաններ է ուղարկել Ադրբեջան՝ Արցախի ու Հայաստանի դեմ օգտագործելու նպատակով։ Այս տեղեկությունները հաստատել էր նաև ՌԴ Արտաքին հետախուզական ծառայության պետ Սերգեյ Նարիշկինը:
ՌԻԱ Նովոստին էլ տեղեկացրել է, որ հոկտեմբերի 16-ին ավելի քան 1000 գրոհային է տեղափոխվել ղարաբաղյան հակամարտության գոտի։
Ձերբակալվել է Արցախի դեմ կռվող ահաբեկչական խմբավորման անդամներից մեկը
Հայտնի է, որ սիրիացի ահաբեկիչներին 1,5-2 հազար դոլար են խոստանում ռազմական գործողություններին 1 ամիս մասնակցելու համար։ Այս տեղեկությունը հաստատել են ոչ միայն հայաստանյան և ղարաբաղյան իշխանությունները, միջազգային ԶԼՄ-ներն ու արտասահմանյան իրավապաշտպան կազմակերպությունները, այլև Սիրիայի, Ֆրանսիայի, Ռուսաստանի, ԱՄՆ–ի և այլ երկրների իշխանությունների ներկայացուցիչներ։
Թուրքիան Հարավային Կովկասը լցրել է ահաբեկիչներով. ՀՀ ԱԳ նախարարի հարցազրույցը
Նշենք, որ հայկական կողմին արդեն հաջողվել է գերեվարել 2 սիրիացի վարձկան–ահաբեկչի։ Նրանցից առաջինին` Մեհրեդ Մուհամմադ Ալշխերին, բռնել են հոկտեմբերի 30–ին, իսկ երկրորդին` Յուսեֆ Էլ Աբեդ Էլ Հաջիին, հայ զինծառայողները գերեվարել են նոյեմբերի 1–ին։ Նրանք արդեն ցուցմունք են տվել և պատմել իրենց հավաքագրելու պայմանների մասին։
