ԵՐԵՎԱՆ, 4 նոյեմբերի — Sputnik. Այսօր օրվա ընթացքում Ադրբեջանի տարբեր դիվերսիոն խմբեր՝ վարձկաններ, ակաբեկիչներ, Արցախի հյուսիսային անտառապատ տարածքներում մի քանի ուղղություններով փորձել են հարձակումներ իրականացնել: Այսօր Արցախի տեղեկատվական շտաբում կայացած մամուլի ասուլիսում տեղեկությունը հայտնեց ՀՀ ՊՆ ներկայացուցիչ Արծրուն Հովհաննիսյանը:
«Այդ անտառները, ձորակները, այն տարածքները, որ ոմանք նշում են, թե մի ձեռքի բազկի երկարություն է մնացել, որ հասնեն Արցախի մայրաքաղաք, իրենց համար դառնալու են դժոխք»,- ասաց Հովհաննիսյանը:
Մարտեր են եղել նաև հարավային ուղղությամբ՝ Որոտան գետի երկայնքով: Այստեղ, Հովհաննիսյանի խոսքով, մի վաշտային խումբ՝ զրահատեխնիկայով, փորձել է հարձակում իրականացնել, բայց կորցրել է 2-3 միավոր զրահատեխնիկա ու հետ շպրտվել:
ՊՆ ներկայացուցիչը նաև հայտնեց, որ մարտերում կիրառվում է ոչ մեծ մասշտաբով օդուժ, հրետանի՝ ոչ մեծ քանակով:
«Բայց այն հատվածներում, որտեղ հարձակման փորձ է իրականացվում, կրակի խտությունը երբեմն բարձրանում է» ,- ասաց նա:
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Նոյեմբերի 4-ի ժամը 13։30-ի դրությամբ` հակառակորդի կրակոցների հետևանքով հայկական կողմից զոհվել են 1177 զինծառայողներ։ Քաղաքացիական անձանց շրջանում կա 50 զոհ ու 148 վիրավոր։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 7155 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 252 անօդաչու սարք, 16 ուղղաթիռ, 25 ինքնաթիռ, 697 զրահատեխնիկա, 6 ՏՈՍ համակարգ։
Ում պետք չէ ռազմաճակատ տանել. պատմության դասերը
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
«Բառերը քիչ են, որ նկարագրեմ». ռազմաճակատից եկած հոր ու նորածին դստեր 1–ին հանդիպումը
