ԵՐԵՎԱՆ, 3 նոյեմբերի – Sputnik. Սյունիքում այս պահին համեմատաբար հանգիստ է։ Տեղեկությունը Երևանում կայացած օրվա ամփոփիչ ճեպազրույցի ժամանակ լրագրողներին հայտնեց Հայաստանի պաշտպանության նախարարության ներկայացուցիչ Արծրուն Հովհաննիսյանը։
«Սյունիքի Դավիթ Բեկ գյուղը երեկ թիրախավորվել էր ոչ մեծ տրամաչափի հրետանային միջոցով։ Այս պահին վիճակը համեմատաբար հանգիստ է»,–ասաց նա։
Հիշեցնենք, որ երեկ Սյունիքի մարզի Դավիթ Բեկ գյուղի հրթիռակոծման հետևանքով զոհվել էր մեկ, վիրավորվել երկու քաղաքացի։
Սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Նոյեմբերի 2-ի ժամը 19։00-ի դրությամբ` հակառակորդի կրակոցների հետևանքով Արցախում զոհվել են 1177 զինծառայողներ։ Քաղաքացիական անձանց շրջանում կա 46 զոհ ու 142 վիրավոր։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 7095 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 251 անօդաչու սարք, 16 ուղղաթիռ, 25 ինքնաթիռ, 685 զրահատեխնիկա, 6 ՏՈՍ համակարգ։
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
«Բառերը քիչ են, որ նկարագրեմ». ռազմաճակատից եկած հոր ու նորածին դստեր 1–ին հանդիպումը
