ԵՐԵՎԱՆ, 2 նոյեմբերի – Sputnik. ՀՀ ոստիկանության պետի տեղակալ Արա Ֆիդանյանն այսօր ԱԺ–ում 2021թ–ի բյուջի նախագծի քննարկման ժամանակ հայտնեց, որ Արցախի դեմ Ադրբեջանի սանձազերծած պատերազմի պատճառով ՀՀ ոստիկանության համակարգի բարեփոխումները կարող են հետաձգվել։
«Պետք է ասել, որ ներկա իրավիճակով, այն է` ռազմական դրությամբ պայմանավորված, հետաձգվել է ուսումնական պրոցեսի մեկնարկը, և հնարավոր է ժամկետների վերանայում»,– ասաց փոխոստիկանապետը։
Ոստիկանության բարեփոխման 2020-22թթ–ի ծրագրով նախատեսված էր ոստիկանության ծառայությունը վերածել ՆԳՆ–ի, ոստիկանության ներքին զորքերի հիմքի վրա ձևավորել ազգային գվարդիա, ստեղծել պարեկային կառավարման և օպերատիվ կառավարման կենտրոններ։ Բարեփոխումների առաջին փուլը նախատեսվում էր գործարկել Երևանում 2021թ–ի առաջին եռամսյակում։
Ֆիդանյանը հայտնեց, որ ոստիկանության համակարգն այսօր ամբողջ ծավալով ներգրավված է և՛ ռազմական դրությամբ պայմանավորված գործողություններում, և՛ համավարակի կանխարգելման միջոցառումներում։
