ԵՐԵՎԱՆ, 2 նոյեմբերի – Sputnik. Այսօր Հադրութի տարածաշրջանի գյուղերից մեկի հատվածում հայկական դիրքերի ուղղությամբ Ադրբեջանը 15-16 դի է թողել ու փախել։ Տեղեկությունը լրագրողների հետ ճեպազրույցում հայտնեց ՀՀ պաշտպանության նախարարության ներկայացուցիչ Արծրուն Հովհաննիսյանը։
Նրա խոսքով` հայկական ուժերն ադրբեջանական բավական մեծաքանակ զորքերի գրոհը հետ են մղել, որի արդյունքում հակառակորդը կորուստներ է ունեցել։
«Մեր դիրքերի դիմաց թողել են մոտ 15-16 դիակ ու փախել են և բացարձակապես մոտիկ չեն եկել, դիակները չեն տարել»,-ասաց Հովհաննիսյանը։ Նրա խոսքով՝ ռազմաճակատում համաճարակային վիճակը շարունակում է պայթյունավտանգ մնալ։
«Արդեն 20 և ավելի օրեր ադրբեջանական զինված ուժերի, վարձկանների, միգուցե այլ պետությունների հատուկ ստորաբաժանումների զինծառայողների դիերը մնում են բաց երկնքի տակ և առաջացնում են լուրջ բնապահպանական խնդիրներ։ Փորձում ենք այդ խնդիրը տարբեր միջոցներով լուծել, որ համաճարակ չառաջանա, բայց դիակներն այդպես մնում են, որովհետև Ադրբեջանը հրադադարի ռեժիմը չի պահպանում , քանի որ թքած ունի սեփական կորուստների վրա»,-ասաց Հովհաննիսյանը։
Հիշեցնենք` Հայաստանի և Ադրբեջանի արտգործնախարարներ Զոհրաբ Մնացականյանն ու Ջեյհուն Բայրամովը հոկտեմբերի 9–ին Մոսկվա էին մեկնել` խորհրդատվություններ անցկացնելու։ ՌԴ արտգործնախարար Սերգեյ Լավրովի հետ համատեղ հանդիպումը տևեց գրեթե 11 ժամ և ավարտվեց համաձայնագրի ընդունմամբ, որը հակամարտության կարգավորման չորս կետ է պարունակում։
Մասնավորապես, կողմերը պայմանավորվեցին, որ հոկտեմբերի 10-ին, ժամը 12։00-ից սկսած հումանիտար նպատակներով հրադադար կհաստատվի ռազմագերիներին, այլ պահվող անձանց և զոհվածների մարմինները փոխանակելու համար՝ Միջազգային Կարմիր խաչի չափանիշներին համապատասխան։ Հրադադարի վերաբերյալ պայմանավորվածությունից հետո Ադրբեջանը շարունակեց հրետակոծել Արցախը։
Հոկտեմբերի 17-ին ՀՀ արտգործնախարարությունը հայտնեց, որ Հայաստանի Հանրապետությունը և Ադրբեջանի Հանրապետությունը երկրորդ պայմանավորվածությունն են ձեռք բերել. որոշվել է հոկտեմբերի 18-ին, տեղական ժամանակով ժամը 00:00-ից հաստատել մարդասիրական զինադադար։
Արցախի ՊԲ–ն, սակայն, հոկտեմբերի 18-ի առավոտյան տեղեկացրեց, որ 07:20-ի սահմաններում հրետանային ակտիվ կրակից հետո ադրբեջանական զինուժը հարավային ուղղությամբ անցել է հարձակման: Երկուստեք եղել են զոհեր ու վիրավորներ:
Հոկտեմբերի 26-ին ՀՀ ԱԳՆ–ն հայտարարեց, որ Հայաստանի և Ադրբեջանի արտգործնախարարները հումանիտար հրադադարի հաստատման երրորդ ժամկետի մասին են պայմանավորվել, որը պետք է ուժի մեջ մտներ 2020թ. հոկտեմբերի 26-ին, տեղական ժամանակով 08:00-ին։ Սակայն Ադրբեջանը խախտեց նաև երրորդ պայմանավորվածությունը։
