ԵՐԵՎԱՆ, 2 նոյեմբերի — Sputnik. Արցախից Հայաստան եկած մեր հայրենակիցների կեցության կամ այլ խնդիրներն այս պահին ինչ-որ ձևով լուծված են։ Ազգային ժողովում լրագրողների հետ զրույցում այս մասին ասաց ՀՀ փոխվարչապետ Մհեր Գրիգորյանը։
«Կա շտաբ, որն էլ զբաղվում է Արցախից ժամանակավոր Հայաստան եկածների հարցերով։ Այս պահին կառավարության աշխատակազմի շրջանակներում է աշխատանքներ իրականացվում` աշխատանքի և սոցիալական հարցերի նախարարության հետ համագործակցելով»,–ասաց փոխվարչապետը։
Նրա խոսքով` այժմ քննարկում է համապատասխան գործիքներ ստեղծելու հարցը, որոնց միջոցով ավելի կանոնակարգված լուծումներ կտան առաջացած խնդիրներին, բայց այս ամենը կախված կլինի այն հանգամանքից, թե իրադարձություններն ինչպես կզարգանան։
Գրիգորյանը վստահեցրեց՝ ցանկացած պահանջվող լուծում կառավարության կողմից կտրվի, որևէ խնդիր չլուծված չի մնալու։ Փոխվարչապետը չբացառեց, որ անհրաժեշտության դեպքում արցախցիներին կարող են տեղավորել նաև առողջարաններում։
Հիշեցնենք, որ Արցախի դեմ Ադրբեջանի սանձազերծած պատերազմի հետևանքով շուրջ 90 000 արցախցի տեղահանվել է, կորցրել տունը և ունեցվածքը:
Սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Նոյեմբերի 1-ի ժամը 14։00-ի դրությամբ` հակառակորդի կրակոցների հետևանքով Արցախում զոհվել են 1166 զինծառայողներ և 45 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6997 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 241 անօդաչու սարք, 16 ուղղաթիռ, 25 ինքնաթիռ, 669 տանկ և ՀՄՄ, 6 ՏՈՍ-1 «Սոլնցեպեկ» համազարկային կրակի ռեակտիվ համակարգ:
Ես չգնամ, էլ ո՞վ գնա. Արցախից եկած մարզիկն ու մարզիչը պատմում են տղաների հերոսության մասին
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
Անմարդկային են կռվում․ հադրութցի Մարո բաբոն սպասում է հաղթանակին ու «հնդկական» երեկոներին
