ԵՐԵՎԱՆ, 1 նոյեմբերի - Sputnik. Ադրբեջանը շարունակում է Արցախի Հանրապետության դեմ սանձազերծված զինված ագրեսիայի ընթացքում միջազգային իրավունքով արգելված՝ պատերազմի վարման մեթոդների և միջոցների կիրառումը։ Մասնավորապես՝ Ադրբեջանի զինված ուժերը կասետային արկերից բացի սկսել են նաև ֆոսֆոր պարունակող հրկիզող զինամթերք օգտագործել, տեղեկացնում է Արցախի Հանրապետության ԱԳՆ–ն։
«Ֆոսֆոր պարունակող հրկիզող զինամթերքը կիրառվել է Արցախի Հանրապետության բնակավայրերի մերձակայքում գտնվող անտառապատ տեղանքներում, որտեղ հարակից գյուղերի խաղաղ բնակչության մի մասը ժամանակավորապես պատսպարվում է ադրբեջանական դիվերսիոն խմբերի գործողություններից», – ասված է հաղորդագրությունում։
Բաքուն, հակառակ իր հայտարարություններին, թե իբր Ադրբեջանի զինված ուժերի թիրախը միայն ռազմական օբյեկտներն են, իրականում դիմում է Արցախի քաղաքացիական բնակչության դեմ ահաբեկման մարտավարությանը, գրված է հաղորդագրությունում։
«Ադրբեջանը, իր առջև որպես հիմնական խնդիր դնելով Արցախի ողջ բնակչության բնաջնջումն ու բռնի տեղահանումը, դիմում է արգելված զենքի օգտագործմանը, խաղաղ բնակիչների և քաղաքացիական օբյեկտների, այդ թվում՝ բժշկական հաստատությունների վրա կանխամտածված հարձակումների իրագործմանը», – ասված է հաղորդագրությունում։
Արցախի ԱԳՆ–ն հիշեցնում է, որ նման պայմաններում, որպես ամբողջ ժողովրդի ֆիզիկական ոչնչացումից պաշտպանելու արդյունավետ միջոց՝ միջազգային հանրությունը ձևավորել է հանուն փրկության անջատվելու և որպես անկախ պետություն միջազգային հարաբերությունների մեջ մտնելու իրավունքը ճանաչելու պրակտիկա։
«Համոզված ենք, որ Բաքվի իշխանությունների կողմից իրենց հանցավոր ծրագիրն ավարտին հասցնելու շարունակական փորձերի պայմաններում Արցախի Հանրապետության փաստացի անկախության միջազգային ճանաչումը համաշխարհային հանրության արդիական և հասունացած միջոց է` իրականացնելու մարդկության դեմ հանցագործությունները կանխելու համընդհանուր ընդունված պարտավորությունները», – տեղեկացնում է ԱՀ ԱԳՆ–ն։
Նշենք, որ «անջատում հանուն փրկության» հասկացությունը լայնորեն կիրառվում է ՀՀ և ԱՀ պաշտոնյաների կողմից` միջազգային հանրությանը Արցախի Հանրապետության ճանաչումը հիմնավորելու նպատակով։ Այդ մասին բազմիցս խոսել է նաև ՀՀ վարչապետ Նիկոլ Փաշինյանը։
Ադրբեջանն արգելված ֆոսֆորային զինամթերք է օգտագործում Արցախում. Զոհրաբ Մնացականյան
