ԵՐԵՎԱՆ, 30 հոկտեմբերի - Sputnik. Վարչապետ Նիկոլ Փաշինյանն ընդունել է Իրանի արտաքին գործերի նախարարի՝ քաղաքական հարցերով տեղակալ Սեյեդ Աբաս Արաղչիին: Տեղեկությունը հաղորդում է վարչապետի մամուլի ծառայությունը։ Վարչապետն ընդգծել է, որ Հայաստանը բարձր է գնահատում Իրանի հետ բարեկամական հարաբերությունները և ողջույններ փոխանցել Իրանի հոգևոր առաջնորդին, նախագահին և կառավարությանը։
«Արաղչին ներկայացրել է Իրանի մոտեցումները տարածաշրջանում ստեղծված իրավիճակի հաղթահարման ուղղությամբ՝ խոր մտահոգություն արտահայտելով շարունակվող ռազմական գործողությունների կապակցությամբ: Պարոն Արաղչին իր ցավակցությունն է հայտնել խաղաղ բնակիչների շրջանում զոհերի կապակցությամբ և դատապարտելի համարել քաղաքացիական ենթակառուցվածքների և բնակավայրերի թիրախավորումը»,- նշված է հաղորդագրության մեջ։
Զրուցակիցները քննարկել են տարածաշրջանային անվտանգության խնդիրները, երկուստեք անհանգստություն հայտնել ռազմական գործողություններում Մերձավոր Արևելքից միջազգային ահաբեկիչների մասնակցության վերաբերյալ։ Սա նրանք դիտարկում են «որպես ընդլայնման ներուժ պարունակող վտանգ, որը սպառնում է ողջ տարածաշրջանի անվտանգությանը»։
Քաղաքական խորհրդակցություններ. ի՞նչ են քննարկել Հայաստանի և Իրանի ԱԳ ներկայացուցիչները
Նշվում է, որ վարչապետը բարձր է գնահատել Իրանի հավասարակշռված և կառուցողական մոտեցումը տարածաշրջանային խնդիրների նկատմամբ:
Հիշեցնենք, որ Իրանի փոխարտգործնախարար Սեյեդ Աբաս Արաղչին նախօրեին որպես ղարաբաղյան կարգավորման հարցով Իրանի նախագահի հատուկ բանագնաց` այցելել է Բաքու, ապա Մոսկվա, իսկ Երևանից մեկնելու է Անկարա։
Արաղչիի այցերի հիմնական նպատակը տարածաշրջանային տերությունների մասնակցությամբ Ղարաբաղյան հակամարտության կարգավորման` իրանական նախաձեռնության մասին շահագրգիռ կողմերին տեղեկացնելն է։
